----- Please Turn on your speakers & listen our " Lanka ART web Radio "----- Send us your art Related news to ** lankaart1@gmail.com ** -----

Pages

Lanka Art Chat Room - එන්න අපි කතා කරමු

නාමෙල් මාලිනී කැදැල්ල

Tuesday, March 15, 2011

නාමෙල් මාලිනී කැදැල්ල

දරුමුණුබුරන් හැමදාම ස්කයිප් එකෙන් මුණගැහෙනවා - නාමෙල්

නාමෙල්ගෙන් අහන්නේ නැතුව කිසිම තීරණයක් ගන්නේ නෑ -මාලිනී

ගිනිගහන මද්දහනක වුණත් ගතට දැනුණේ සුවදායක සිසිලසක්. හතරවටින් ආපු සුළං රැළි නිවසේ විශාල දොර කවුළු තුළින් නිවෙසට ඇතුළුවෙනවා. අපි හිටියේ හරියටම බොරැල්ල මංසන්ධියේ පිහිටි ගොඩනැඟිල්ලක තුන්වැනි මහලේ. මේ කොන්ක්‍රීට් පුරවරය මැද සුවදායක සිසිලසක් කොයින්ද කියලා කෙනෙකුට හිතෙන්න පුළුවන්.

ඒත් ඒක සත්‍යමයි. නාමෙල් - මාලිනී පුංචි තියටර් හි තුන්වැනි මහල වෙන්වුණේ මේ යුවළගේ නිවහන වෙනුවෙන්. නිවෙසට පිවිසුණාම අපටත් හිතාගන්න බෑ අපි ඉන්නේ මේ බොරැල්ල මංසන්ධියේ ද කියල.

අපේ ආලින්දය සරසන්නේ පුරා දශක ගණනාවක් කලාවේ රැඳුණු සහ අදටත් කලාවේ සිටින අඹු සැමි යුවළක් වෙනුවෙන්. ඒ නාමෙල් වීරමුනි සහ මාලිනී වීරමුනි. මේ සුසංයෝගය කලාවට කොයිතරම් ගැළැපුණාද කියනවා නම් අද අපේ රටේ ප්‍රසිද්ධ අලංකාර කලාගාරයකුත් මේ නමින් තිබෙනවා. ඒ නාමෙල්- මාලිනී පුංචි තියටර් එක.

කවදත් ඉහළින්ම ආගන්තුක සත්කාරයන්ට කැප වී සිටින මාලිනී අපේ පැමිණීම වෙනුවෙන් කල් ඇතුවම සූදානම්ව සිටියා. ඇගේ ජීවිතේ පිළිවෙළ කෙතරම් ද කියනවා නම් අපි නිවෙසට යන මොහොත වන විටත් මේ යුවළ සූදානම්ව, මේක් අප් දාගෙන අපේ පැමිණීම බලාපොරොත්තුවෙන් සිටියා.

මහල් සතරකින් සැදි පුංචි තියටර් හි පළමු සහ දෙවන මහල වෙන් වෙන්නේ කලා කටයුතු වෙනුවෙන්. සිවුවැනි මහල ද නාට්‍ය පුහුණු කිරීම්, චිත්‍ර පන්ති පැවැත්වීම ආදිය සඳහා විවෘතයි. තුන්වැනි මහල නාමෙල් - මාලිනී යුවළගේ අලංකාර කැදැල්ලයි. කැදැල්ල කිව්වට දැන් මේ කූඩුවෙ ඉන්නේ කුරුල්ලයි කිරිල්ලියි විතරයි. දරුවන් සියලු දෙනාම තම තමන්ට වෙන්වුණු පුංචි කැදලි තනාගෙන මේ නිවෙසින් පිටත්ව ගිහින්.

වෘත්තියෙන් නීතිඥවරයකු වන නාමෙල් බොහෝ කාලයක් විදේශගතව සිටිය බැවින් දරුවන් සමඟ මාලිනී ද ජීවත්වූයේ විදේශයන්හිය. මේ යුවළගේ දරුවන් තිදෙනා වැඩිපුරම හැදුණේ විදේශයන්වලය. අද මේ දරුවන් තිදෙනාම දූදරුවන්ගේ සුරතල් බලන මවුපියන්.

”අපේ වැඩිමලා දියණියක්. ඇය සලස්නා වීරමුනි. එයා දොස්තරවරියක්. ඇයට නැවකදී මුණගැසුණු විදේශිකයකු සමඟ විවාහ වී දැන් නවසීලන්තයේ පදිංචිව සිටිනවා.

දෙවැනියා පුතා හේෂාන් වීරමුනි. එයා වෙබ් ඩිසයිනර් කෙනෙක්. ඇමරිකාවේ පදිංචි වෙලා ඉන්නේ. සුදු ජාතික කාන්තාවක් සමඟ විවාහ වෙලා එයාටත් බබාලා දෙන්නෙක් ඉන්නවා.

බාල පුතා ධාරිත වීරමුනි. එයත් ළඟදි විවාහ වෙලා දරුවෙක් අපේක්ෂාවෙන් ඉන්නවා. එයා ඉන්නේ නවසීලන්තයේ. ලෙෆ්ටිනන්ට් කෙනෙක් විදියට රාජකීය නාවික හමුදාවේ කටයුතු කරනවා.

තුන්දෙනාම විවාහ වුණේ විදේශීය ජාතීන් සමඟ. ඒකට අපි හරිම කැමැතියි. අපේ දරුවෝ ඒ අය ආදරෙන් බලාගන්නවා නම් මව්පියන් හැටියට අපි වෙන මොනවද බලාපොරොත්තු වෙන්නේ.

නාමෙල් - මාලිනී යුවළ මුණුපුරු මිණිපිරියන්ගේ හුරතල් විඳින්න වසරකට වතාවක් දූ දරුවන් බලන්න යනවා. ඒත් එක්කම හැමදාම ඔවුන් සියලුදෙනා අම්ම- තාත්තා බලන්න නිවහනට එනවා කියලයි ඔවුන් කිව්වේ. ඒ ස්කයිප් එක ඔස්සේ.

මේ නිවෙසේ තීන්දු තීරණ සියල්ල ගන්නේ දෙදෙනා සාකච්ඡා කිරීමෙන්. එහෙත් මාලිනි කිව්වෙ ඇය කිසිම තීරණයක් නාමෙල්ගෙන් අහන්නෙ නැතුව ගන්නෙ නෑ කියලයි.

මාලිනී – නාමෙල් විවාහ වී දශක හතරකට වැඩි කාලයක් මේ වෙනකොට ගතවෙලා ඉවරයි. එහෙත් මේ දෙන්නගේ හැසිරීමෙන් කතාබහෙන් තවමත් අපට පේන්නේ ආදරේ, සෙනෙහස උතුරන අලුත්ම අලුත් යුවළකගේ හැසිරීම් රටාව. මාලිනී ආදරේට නාමෙල්ව අමතන්න නම් කිහිපයක්ම කියනවා අපට ඇහුණා. ‘තාත්ති’, ඩාලිං වගේම වෙලාවකට ‘ඩලෝ’ කියලත් කියනවා. නාමෙල් නම් මාලිනී අමතන්නේ එක්කො ‘මාලිනී’ කියලා නැත්නම් ‘අම්මි’ කියලා.

’ඇත්තටම අපි දෙන්නා අදටත් එදා වගේම සතුටින් ජීවත්වෙනවා. වෙලාවකට දෙන්නා රණ්ඩු කරගන්න අවස්ථා ආර්ගිව්මන්ට්ස් යන අවස්ථා තිබෙනවා. හැබැයි ඒ හැම දේම වෙන්නේ කලාව ගැන කතාකරන්න ගිහින්.” මාලිනී කියනවා.

මාලිනීගේ අත් උදව්වට කලක පටන්ම ඉන්න විශ්වාසවන්ත කෙනෙක් මේ නිවෙසේ ඉන්නවා. ඒ වුණත් උයන්න හිතුණම ඇය කුස්සියට වැදිලා උයනවා. ඒ වගේම තමයි මාලිනීට හැම දෙයක්ම ක්‍රමානුකූලව පිරිසුදුවට තියෙන්න ඕන. ඉතින් ගේ දොර අස්පස් කරන්න, පිරිසුදු කරන්නත් ඇයට සෑහෙන වෙලාවක් යනවා.

”මම උදේ නැගිට්ට ගමන් කරන්නේ ඇල්වතුර එකක් බීලා මගේ මල් පැළ ටික සහ අනෙක් පැළ වර්ග ටිකට සාත්තු සප්පායම් කරන එක.

මේ නිවෙස වටේ තිබෙන ඉඩ ප්‍රමාණය තුළ පිරී පවතින්නේ පෝච්චිවල ඉන්දපු පැළවලින්. මල් පැළ වර්ග වගේම, අඹ, දෙහි, දොඩම්, ජම්බු, කරපිංචා කතුරුමුරුංගා, උගුරැස්ස වැනි පලතුරු සහ නිවෙසේ කටයුතු සඳහා අවශ්‍ය වෙනත් පැළ වර්ග ද වවා තිබෙනවා.

මේ අවට පරිසරය වසා තිබෙන ශාක නිසාම නිවෙසට රැගෙන එන්නේ සිසිල් සුවයක්. නාමෙල් ගේ කියවීම් කාමරය අද්දර ඇය පෝච්චිවල සිටුවා ඇත්තේ ඇට්ටේරියා මල් ගස්. රාත්‍රියේ පිපුණු ඇට්ටේරියා මල් සුවඳින් අපි යන විටත් ඒ කාමරය පිරී තිබුණි.

මාලිනී රංගනයට දක්ෂයෙක් වගේම උයන්න පිහින්නත් දක්ෂය. ඇය සිය මුණුපුරුන් බලන්නට ගිය විට සිංහල ක්‍රමයට බත් මාළු උයා මුණුපුරන්ට කවනවාලු. මිරිස් තුනපහ දාපු මාළුත් එක්ක ඒ පුංචි පැටව් ‘හායි හූයි’ ගගා ආච්චි උයපු බත් කන්න ආසයි කියලයි මාලිනී කිව්වේ.

”මේ නිවෙසේ මුදල් පරිපාලනය සියල්ල කෙරෙන්නේ නාමෙල් අතින්. එහෙත් පසුගිය කාලයේ නාමෙල් විදේශ ගත වූ බැවින් මාස කිහිපයක් මාලිනී ඒ වැඩෙත් හරියට කළ බව අපිට දැනගන්න ලැබුණා.

දරු මුණුපුරෝ බලන ආච්චිලා සීයලා වුණාට නාමෙල් - මාලිනී යුවළ තවමත් සිය ඇඳුම් පැලඳුම් ගැන මෝස්තර ගැන සෞඛ්‍යය ගැන උනන්දු වෙනවා. නාමෙල් නම් උදේට හැමදාම ඇවිදින්න යනවා. මාලිනී නිවෙසේදී ව්‍යායාමවල යෙදනවා. මාලිනීට ඉතා පිළිවෙළට අඳින්න ඕන කෙනෙක්. ඇය නිවෙසට අමුත්තන් පිරිසකට ආරාධනා කළොත් එදාට නිවෙස සරසන දේට, කෑම බීම සඳහා යොදාගන්නා පිඟන් කෝප්පවල පාටට ගැළපෙන අන්දමින් තමයි ඇයත් සැරසෙන්නේ.


Copy Rights - Silumina

0 comments:

Post a Comment