----- Please Turn on your speakers & listen our " Lanka ART web Radio "----- Send us your art Related news to ** lankaart1@gmail.com ** -----

Pages

Lanka Art Chat Room - එන්න අපි කතා කරමු

‘ක්ලැරන්ස්ගේ ගී රජිව් ට තහනම් ද?’

Tuesday, June 18, 2013

‘ක්ලැරන්ස්ගේ ගී රජිව් ට තහනම් ද?’

සංවාදය
 
සිරි හෙට්ටිආරච්චිගෙන් රජිව් සෙබස්තියන්ට පිළිතුරු
මුදල් ගෙවා ලබාගත් සින්දු මිසක් ක්ලැරන්ස්ගේ වෙන සින්දු කිව්වොත් අපි සෙබස්තියන්ට නඩු පවරනවා
ක්ලැරන්ස් විජේවර්ධන පාර්ශවයෙන් රජිව් සෙබස්තියන්ට කැලැරන්ස්ගේ ගීත තහනම් බැව් පවසන නමුත් රජිව් පවසන්නේ තමන් දිගටම ක්ලැරන්ස්ගේ ගී ගායනා කරන බවයි. ඒ සම්බන්ධයෙන් පසුගිය දෙවැනිදා ‘රසඳුන’ සමඟ රජිව් විශේෂ හෙළිදරව්වක් කළ අතර ඊට එරෙහිවූ සිරි හෙට්ටිආරච්චි ‘ක්ලැරන්ස්ගේ ගී රජිව්ට තහනම් ද’ සංවාදයට එක් වෙමින් කළ කතා බහයි මේ.
“මම මුලින්ම ත්‍යාගරාජා රජිව් ජෝශප් සෙබස්තියන් එහෙම නැත්නම් රජිව් සෙබස්තියන් ශීලා විජේවර්ධන මහත්මියටත් මටත් දොස් පවරමින් ජුනි දෙවැනිදා “රසඳුන” මඟින් කළ සියලුම ප්‍රකාශ අමූලික බොරු බව සහතික කොට පවසනවා. සෙබස්තින් කියලා තියෙන්නේ පට්ටපල් බොරු. (“රජිව් කියා ලියන්න එපා” යයි ඉල්ලමින්...) කටට ආපු බොරු ඇද බාලා මිනිස්සු රවට්ටලා. ඒ වගේම වැදගතුන්ට නිග්‍රහ කරලා. කාට ද ඔහු මේ අපහාස කරලා තියෙන්නේ. රත්නපුර බටුගෙදර හොඳ වලව්වකින් පැමිණි කුල කාන්තාවක් වන, ක්ලැරන්ස් විජේවර්ධන මහත්මයාගේ ආදරණීය බිරියටයි.
 ශීලා විජේවර්ධන මහත්මියගේ මියගිය ස්වාමි පුරුෂයාගේ ගීත ගායනා කරමින් ජීවත් වෙමින් මොහු කරන දේ හරිද. මියගිය ක්ලැරන්ස්ගේ නමට කොච්චර අගෞරවයක් ද ඔහුගේ ඇටකටු මතක් කර ප්‍රකාශ කරද්දී. මේ වැදගත් මිනිස්සු කරන ප්‍රකාශ නෙමේ, මුඩුක්කු වලින් ආපු මිනිස්සු කියන දේවල්. අද මුඩුක්කු වල මිනිස්සුවත් ඔය වගේ ජරා කතා කියන්නේ නැහැ. කිසිම වැදගත්කමකට නැති මොහු කියපු දේවල් වලට රසඳුනේ ඉඩ දුන්නා නම් මේ අපි කියන දේවලුත් කෙළින්ම පළකර දෙන්න කියා මං ඉල්ලා සිටිනවා. එසේ නැත්නම් ක්ලැරන්ස්ගේ පාර්ශවයෙන් අපිට ලොකු අසාධාරණක් සිද්ධ වෙනවා.”
“මම නැවතත් කියනවා, සෙබස්තියන් කියා තිබුණු සියලුම කාරණා පට්ටපල් බොරු කියලා. මම ඔහුට අභියෝග කරනවා - මං මේ කියන එක කරුණක් හෝ බොරු නම් මට විරුද්ධව නඩු පවරන්න කියා. ඔය සෙබස්තියන් කියන කරන තරමක් කියන්නේ කරන්නේ බොරුමයි.”
ඔබ එලෙස පැවසුවත් ක්ලැරන්ස් ජීවත්ව සිටියදී තමන් සමඟ කළ කී බොහෝ දේවල් පිළිබඳ රජිව් සාක්ෂි ඇතුව පවසා තිබුණා නේද..?
“මම ඒ සියල්ල ගැන ශීලා විජේවර්ධන මහත්මියගෙන් විමසා බැලුවා. ඇය පැවසුවේත් ඔය සෙබස්තියන් පවසා තියෙන්නේ අමූලික බොරු බවයි. (“ඔය සේරම හෙළිදරව් කරලා ඇත්ත පෙන්නලා දෙන්න ඉක්මනින්ම ආයෙමත් විජේවර්ධන මහත්මිය ලංකාවට එනවා කියලත් කිව්වා” යයි සිහිපත් කරමින්...) මම දන්නා අයුරින් මම පවසන්නේත් එයමයි. ක්ලැරන්ස් මහත්මයා ජීවත්ව සිටිද්දී කිසි දවසක සෙබස්තියන් ඔහුගේ නිවෙසට පැමිණ නැති බව අපි තවදුරටත් පැහැදිලිවම පවසනවා. හැබැයි ගේට්ටුව ගාවට ඇවිල්ලා හිටගෙන ඉඳලා හැරිලා ගියා කියලා නම් ආරංචියක් තියෙනවා.
ක්ලැරන්ස් මහත්මයාගේ තලපත්පිටියේ ගෙදරට මුලින්ම ඔය සෙබස්තියන්ව එක්කන් ගියේ මමයි. ඒ අපි පවරා තිබුණු නඩුව සමථයකට පත් කර ගන්න කතාබහ කිරීමටයි. එතකොට ක්ලැරන්ස් ජීවතුන් අතර නැහැ. විජේවර්ධන මහත්මිය උන්නේ ඕස්ට්‍රේලියාවේ. මට තාම මතකයි, සෙබස්තින් එදා සරමක් ඇඳගෙන ආවේ. හර්නියා ඔපරේෂන් එකක් කරලයි ඉන්නේ කිව්වා. මම දන්නේ නැහැ ඇත්තද බොරුද කියලා. එතැන ඉඳලා සෙබස්තියන් පවසා ඇති හැමදේම බොරු. ඒ නිසා මම හැමදේම මුල ඉඳලා කියන්නම්.”
“සෙබස්තින් කියනවානේ ඔහුගේ සංගීත ක්ෂේත්‍රයේ වීරයා ක්ලැරන්ස් කියලා. එසේ නම් ඔහු සරත් කොතලාවල සමඟ එකතු වී අනවසරයෙන් ක්ලැරන්ස්ගේ ගී ගයා CD වලට ඇතුළත් කළේ ඇයි..? එම නිසා තමයි 2005 දෙසැම්බර් මාසයේ දී ශීලා විජේවර්ධන මැතිනිය සෙබස්තියන්ටයි, සරත් කොතලාවලටයි විරුද්ධව කොළඹ මහාධිකරණයේ නඩුවක් (අංක ඩ්ඛ්/සිවිල්/26-2005 නඩුව) පැවරුවේ. නඩුව විභාගයට ගැනීමට සූදානම් වනවිට සෙබස්තියන් මා සමඟ සාකච්ඡා කර එය සමථයකට පත් කර ගත්තා.
 ඒත් විජේවර්ධන මහත්මිය එයට තරයේ විරුද්ධ වුණා. මගේ තනි කැමැත්තට අපි සමථයකට ආවා, අවුරුද්දක් ඇතුළත ලක්ෂ 20 ක් ගෙවීමට මහාධිකරණයේ දී පොරොන්දු වෙලා. ඒ අනුව එම නඩුව තාවකාලිකව ඇණ හිටියා. හැබැයි අධිකරණය සෙබස්තියන්ට නියම කළා අනවසරයෙන් ක්ලැරන්ස්ගේ ගී ගායනා කිරීම සපුරා තහනම් බවටත්, එසේ ගායනා කිරීමට අවශ්‍ය නම් ශීලා විජේවර්ධන මහත්මියගෙන් දින 14 කට කලින් ලිඛිතව අවසර ගත යුතු බවටත් ගායනා කරන ගීත වලට 30% ක මුදලක් ගෙවිය යුතු බවටත්. මේවා සියල්ලම නඩු වාර්තාවේ සදහන් වී තිබෙනවා. ‘සෙබස්තියන්ට ඒවා දැන් මතක නැද්ද’ කියා මට හිතෙන හින්දයි මෙහෙම නැවත මතක් කර දෙන්න හිතුවේ.”
“මම කියන්නේ සාක්ෂි තියෙන කාරණායි. මියගිය පුද්ගලයින්ගේ නම් සදහන් වෙන කාරණා මං ඉදිරිපත් කරන්නේ නැහැ. අවුරුද්දක් ඇතුළත පොරොන්දු වූ මුදල සෙබස්තියන්ට ගෙවන්න බැරි වුණාම නැවත නඩු දිනේකදී ඔහු ඇස්වල කඳුළු පුරෝගෙන මහාධිකරණ භූමියේ දී මා ළඟට ඇවිත් ‘තව අවුරුද්දක් කල් දෙන්න’ කියා බැගෑපත් වුණා. මම අනුකම්පා කර සෙබස්තියන්ට මුදල් ගෙවීම සඳහා තව අවුරුද්දක් ලබා දෙන ලෙස නීතිඥයන්ට උපදෙස් දුන්නා. දැන් එම කාල සීමාවත් ඉවරයි. තවම ඔහු ගෙවා තිබෙන්නේ රුපියල් ලක්ෂ 7 1/2 ක් (හත හමාරක්) පමණයි.
තව රුපිල් ලක්ෂ 12 1/2 ක් ඔහුගෙන් අපට අයකර ගැනීමට තියෙනවා. මීට අමතරව ලක්ෂ 2 1/2 ක (දෙකහමාරක) අගරු චෙක් පතක් සෙබස්තියන් මා හට දී වංචාවක් කර තිබෙනවා. ඒ සම්බන්ධයෙන් අප මහරගම පොලිස් ස්ථානයේ පැමිණිල්ලක් කළා. මේවා බොරු නෙමේ. පොලිස් පොතේ මේ විස්තර සියල්ලම සටහන් වී තියෙනවා. ඒ වගේම අගරු වූ චෙක්පත ඉදිරිපත් කරන්නත් පුළුවන්. නඩු අංකය ඉදිරිපත් කරන්නත් පුළුවන්.
සෙබස්තියන් මාව පමණක් නෙමේ කාලයකට ඉහත දමයන්ත කුරුප්පු සහ සරත් කොතලාවල ඇතුළු කිහිප දෙනෙකුවම රවටා තියෙනවා. සෙබස්තියන් කාඩ්බෝඩ් ක්ලැරන්ස් වි?ජේවර්ධන කෙනෙක් වෙන්න ගිහින් ‘සුසීමා’ ටෙලි නාට්‍යයේ ක්ලැරන්ස්ගේ සින්දු පොඩ්ඩක් එහා මෙහා කරලා හදලා දුන්නු ‘සුසීමා’ චිත්‍රප?ටයේ සින්දු අසාර්ථක වීම නිසා එහි නිෂ්පාදකයින්ට බරපතළ පාඩුවකුත් සිදු වුණා. ඒ ගැන ‘සුසීමා’ චිත්‍රපටයේ නිෂ්පාදක සහ අධ්‍යක්ෂ මහතුන්ගෙන් අසා දැන ගන්නත් පුළුවන්.”
2001 නොවැම්බර් මාසයේ දිනයකදී ක්ලැරන්ස් උපහාර ප්‍රසංගයක් පවත්වා ශීලා විජේවර්ධනට මුදල් පරිත්‍යාගයක් කළ බවත් රජිව් සෙබස්තියන් පැවසුවා නේද..?
“එයත් අමූලික බොරුවක්. ආනන්ද විදුහලේ ආදි ශිෂ්‍ය සංගමයට ආධාර පිණිස පැවැත්වූ ක්ලැරන්ස්ගේ ගී ගායනා කළ සංගීත ප්‍රසංගයකදී එම සංගමයේ භාණ්ඩාගාරිකවරයා අත්සන් කළ මුදල් චෙක් පතක් නම් දමයන්ත කුරුප්පු මහත්මයා විජේවර්ධන මහත්මියට බාර දුන්නා. එම ප්‍රසංගය සෙබස්තියන් පැවැත් වූ ප්‍රසංගක් නොවේ. ඉතින් ඒ මුදල සෙබස්තියන් දුන්නු මුදලක් වෙන්නේ කොහොමද. ඔය වගේ පට්ටපල් බොරු තමයි ඔහු ඇද බාන්නේ.”
රජිව් සාක්ෂි ලෙස ඉදිරිපත් කරන ඔහුට ක්ලැරන්ස් එවූ ලිපිය සහ ගුවන් විදුලියේ ගීත අනුමැතිය ලද බව සනාථ කරන ලිපිය ඔබ පිළිගන්නවා ද..?
“නැහැ. මම කොහොමත්ම ඒවා පිළිගන්නේ නැහැ. සෙබස්තියන්ට ගොඩාක් බොරු කියන්න, කරන්න පුළුවන්. ක්ලැරන්ස්ගේ අස්සන හොරට ගහලා ඉදිරිපත් කළා ද දන්නේ නැහැනේ. මං හිතනවා ක්ලැරන්ස් එව්වා කියන ලිපිය ව්‍යාජ අස්සනක් යොදා ගත් ලිපියක් කියලා. ගුවන් විදුලියේ ගීත අනුමත වූ ලිපිය ගැන මං දන්නේ නැහැ. විජේවර්ධන මහත්මිය එය විශ්වාස කරන්නෙත් නැහැ. ඒ නිසා එම ලිපි අපි තරයේම ප්‍රතික්ෂේප කරනවා.”
එසේ නම් රජිව් ඉදිරිපත් කර ඇති ජීවමාන පුද්ගල සාක්ෂි පිළිබඳ ඔබ පවසන්නේ කුමක්ද..?
“මම ‘රසඳුන’ ඉල්ලා සිටිනවා - සෙබස්තින් ඉදිරිපත් කරන එම ජීවමාන සාක්ෂිකරුවන් වන දයානන්ද පෙරේරා, සරත් කොතලාවල, විජය රාමනායක, කුලරත්න ආරියවංශ වැනි මහත්මයින්ගෙන් විමසා බලන්න කියා. ඒ වගේම දමයන්ත කුරුප්පු මහත්මයාගෙනුත් හුඟාක් කාරණා දැන ගන්න පුළුවන්. කුරුප්පු මහත්මයා ළඟ ඉඳලා යම් යම් දේවල් ඉගෙන ගෙන අන්තිමේ දැන් ඒ මහත්යාට දොස් කියන සෙබස්තියන් ගැන දැන ගන්න ඉන්න හොඳම ජීවමාන පුද්ගල සාක්ෂිය කුරුප්පු මහත්මයාමයි, සෙබස්තින් වගේ නෙමෙයි ඒ මහත්මයා. මම වගේ එංගලන්තයේ අධ්‍යාපනය ලබපු උසස් අධ්‍යාපන සුදුසුකම් තියෙන මහත්මයෙක් තමයි කුරුප්පු මහත්මයාත්.”
ක්ලැරන්ස්ගේ මළගමට ඔබ උන්නා නම් එය ඔප්පු කරන ලෙස රජිව් අභියෝග කරනවා නේද..?
“එයාගේ මොන අභියෝගයක් ද ඕක. එදා සෙබස්තියන් අස්සක මුල්ලකවත් ඉන්නවා නම් මම දැක්කේ නැහැ. මළගමේ ඍඩ්ඉ පටය මා ගාව තාම තියෙනවා. ඕනෑම වෙලාවක මට එය ඉදිරිපත් කරන්න පුළුවන්. ඔය ඔක්කොම පසුපස ඉන්නවා ක්ලැරන්ස් හින්දා යන්තම් නමක් හදා ගත්ත ෂෙල්ටන් වීරරත්න කියලා පුද්ගලයෙක්. ඒ පුද්ගලයා දෙන වැරදි උපදෙස් අනුව තමයි සෙබස්තියන් ඔය කියවන්නේ. ෂෙල්ටන් වීරරත්නත් දැන ගත්තොත් හොදයි, මම ශීලා විජේවර්ධන මහත්මියගේ පමණක් නොවේ අමිලා විජේවර්ධන මෙනවියගේත් ඇටෝර්නි බලකරු බව.”
ඔබ ශීලා විජේවර්ධනගේ ඥාතියෙකු නොවන බවත් රජිව් පවසනවා..?
“මගේ නෑදෑකම හොයන්න සෙබස්තියන්ට තියෙන අයිතිය මොකක්ද. ඔය නෑදෑකම සහෝදරකම් ඔක්කොටම වඩා වටින්නේ ‘ඇටෝර්නි බලකරු’ කියන එකයි. එය හරිහැටි නොදන්න අය එක්ක වාද කරලා තවදුරටත් කාලය නාස්ති කරන්න මං බලාපොරොත්තු වෙන්නේ නැැ. ‘එම්’ එන්ටටේන්මන්ට්ස් එකෙන් මුදල් ගෙවා අරගෙන කියන සින්දු ඇරෙන්න ක්ලැරන්ස්ට අයිති වෙනත් සින්දු කොතැනකදී හෝ සෙබස්තියන් කිව්වොත් ගන්න පුළුවන් ඉහළම නීති මාර්ග ගැනීමට පියවර ගන්නා බව අවසාන වශයෙන් මම සහතික කොට කියනවා.”
READ MORE - ‘ක්ලැරන්ස්ගේ ගී රජිව් ට තහනම් ද?’

ළමයින් වෙනුවෙන්ම බිහිවුන, SLBC "විදුල" ළමා ගුවන් විදුලිය


ශ්‍රී ලංකා ගුවන්විදුලි සංස්ථාව මගින් ළමයින් වෙනුවෙන්ම වෙන්වූ ගුවන් විදුලි සේවාවක් හදුන්වා දී තිබේ. 

මෙම ගුවන් විදුලි සේවාව හදුන්වන නාමය වන්නේ විදුල ළමා ගුවන් විදුලිය යි. 
FM 107.5 ඔස්සේ මෙම සේවාව රසවිදිය හැක.
----------------------------------------
හැත්තෑව දශකයේ අගභාගයේ සහ අසූව දශකයේ රසවිඳි ළමාගීවල 
රසය නැවතත් ඔබේ දෙසවනට......සිතින් නැවතත් ඔබේ ළමා කාලයට පියමණින්න.......ඔබ ඇසූ ළමා ගී ඒ හඬින්ම ඔබේ දරුවාටත් රසවිඳින්න අවස්ථාව ලබා දෙන්න....


ශ‍්‍රීලංකා ගුවන් විදුලි සංස්ථාවේ 
විදුල ළමා ගුවන් විදුලියේ උදෑසන විකාශය 
දැන් ඔබට පෙරවරු 05.30 සිට පෙරවරු 08.00 දක්වා 
 
Fm 107.5 Mhz
 
ඔස්සේ සවන් දිය හැකියි.

එසේම ඒ පිළිබදව ඔබ දක්වන 
ආකල්ප නව යෝජනා ඇතොත් අපට ලියා දැන්වීම මගින්, 
උදා විකාශය ගුනාත්මක බවින් ප‍්‍රචාරය කිරීමට 
හැකිවන බව දන්වා සිටිමු.

විදුල ශ‍්‍රාවක සමීක්‍ෂා
විදුල ළමා ගුවන් විදුලිය
ශ‍්‍රීලංකා ගුවන් විදුලි සංස්ථාව
කොළඹ 07

READ MORE - ළමයින් වෙනුවෙන්ම බිහිවුන, SLBC "විදුල" ළමා ගුවන් විදුලිය

’අභීත දියණිය’

පුංචි කුමාරයාට වෙන දේ හරියට මට වෙනවා වගෙයි

‘අභීත දියණිය’ පුංචි කුමාරයාට හඬ කවන
යොං සෝ කුමරු
මේ දිනවල ජාතික රූපවාහිනියෙන් විකාශය වන ’අභීත දියණිය’ මාලා නාටකය වයස් භේදයකින් තොරව ලොකු පොඩි කා අතරත් එකසේ ජනපි‍්‍රය යි. ‘දොං යී’ ගේ පුංචි පුත් කුමරු ‘යොං සෝ’ ට කුඩා දුවා දරුවන් දක්වන්නේ ඉමහත් ආසාවකි. මේ පුංචි කුමරු ගේ චරිතය මෙතරම් ජනපි‍්‍රය වීමට එම චරිතයට පණ දෙන කට හඬ ඉවහල් වී තිබේ. ‘යොං සෝ’ ට හඬ කවන්නේ තවමත් පාසල් වියේ පසුවන පුංචි පුතෙකි. ඔහු නමින් නිරෝෂ් ලක්ෂාන් ද සිල්වායි. පොකුණුවිට සිරිමෙවන් මහා විද්‍යාලයේ හත්වන ශ්‍රේණියේ ඉගෙනුම ලබන මේ පුංචි පුතු කලා හැකියාවන්ගෙන් ඉදිරියෙන් ම සිටින්නේය. ලක්ෂාන් තමා හඬ කවන පුංචි පුත් කුමරුගේ චරිතය ගැන අපිත් එක්ක කතා කළේ මේ විදිහට.
”දොං යී ගෙ පුංචි පුතා හරිම හුරතල්. ඔහුට මගේ හඬ ලබාදෙන්න හැකිවීම ගැන මම හුඟාක් සතුටු වෙවා. එය ඉතාම සංවේදී චරිතයක්. මම හඬ කවන කොට දැනෙන්නේ පුංචි කුමාරයට වෙන දේ හරියට මට වෙනව වගේයි. ඉතින් සංවේදී තැන්වල දී මටත් ඇත්තටම එයා අඬන කොට ඇඬෙනවා.
ලක්ෂාන් ගේ කලා හැකියාවන් හඳුනාගෙන ඔහුව දිරිමත් කරන අය බොහෝයි.
”මම පුංචි දවස්වල ඉඳලම කථික තරග, ගායනා ආදියට දක්ෂයි. කොහොමින් හෝ පොකුණුවිට ශ්‍රී විනයාලංකාර අපේ පන්සලේ දහම් පාසලේ වැඩසටහනක් කරන්න ජාතික රූපවාහිනියෙන් පැමිණියා. එහිදී මම ස්තූති කතාව කළා. මෙතනට පැමිණ සිටියා ජාතික රූපවාහිනියේ ප්‍රධානියකු වන අතුල රන්සිරිලාල් මාමා. එතුමා තමයි මාව ජාතික රූපවාහිනියට ගෙනැවිත් හඬ කැවීම් ඇතුළු කලා කටයුතුවලට දායක කර ගත්තේ. එතුමාගේ මඟ පෙන්වීම නොවන්නට අද මට මෙතරම් දුරක් එන්නට ලැබෙන්නේ නැහැ.
අද වන විට හුඟාක් කාටුන් වැඩසටහන්වලට මම හඬ කවලා තිබෙනවා. ඒ අතර ‘අතුරු මිතුරු’, ‘දුනුවලිගා’ විශේෂයි. ඒ වගේම ඒකාංගික ටෙලිනාට්‍යකත් චරිත නිරූපණය කරන්න අවස්ථාව මට හිමි වුණා. මගේ අනාගත බලාපොරොත්තුවත් කලා අංශයෙන්ම ඉදිරියට යාමයි.
මුලදී යම් චකිතයක් හිතේ තිබුණත් දැන් නම් එයට හුඟාක් හුරුයි. ඒ වගේම හුඟාක් ආසාවෙන් තමයි හඬ කැවීම් කටයුතු කරන්නේ. මට හිතෙන්නේ ‘යොං සෝ’ කුමරු මගේ ඇඟේ ජීවත් වෙනවා කියලයි.
සහෝදරියන් දෙදෙනකුගෙන් යුත් පවුලේ එකම පිරිමි දරුවා වන ලක්ෂාන් කලාවේ නිරතවීමට අත හිත දුන් සැමටම තම ස්තූතිය පුද කර සිටිනවා.
”අභීත දියණී” නාට්‍යය නරඹන හුඟදෙනෙක් මට දුරකථනයෙන් අමතා ඔවුන් ගේ සුබ පැතුම් පිරිනමනවා. ඒ වගේම පාසලේ විදුහල්පතිතුමා, ගුරුවරුන්, යහළු යෙහෙළියන් වගේම පන්සලේ ධම්මානන්ද හිමියන් ඇතුළු හැමදෙනෙක් ම මට ආශිර්වාද කරනවා. ඒ ගැනත් නිහතමානීව මම සතුටු වෙනවා.”
සිරිමෙවන්ගම, පොකුණුවිට ලක්ෂාන් ගේ ලිපිනයයි.
READ MORE - ’අභීත දියණිය’

ඇය සෙනාලි

එංගලන්තයේ හිටපු නිසා මගේ රංගනය ගැන සැකයක් සෝමේ අංකල්ට තිබුණා

'සිරි පැරකුම්' හි සිරිමල් එතනා සෙනාලි ෆොන්සේකා
කවුද මේ ‘සිරිමල් එතනා'? මේ දිනවල තිරගත වන “සිරිපැරකුම්” චිත්‍රපටය නරඹන ප්‍රේක්ෂකයන්ට නැ‍ඟෙන ප්‍රශ්නයකි ඒ. ඇය සෙනාලි ෆොන්සේකා. සෙනාලි ලංකාවේ ප්‍රසිද්ධ කලා පවුල් දෙකකට සම්බන්ධ කෙනෙක්. “රසඳුන” වෙනුවෙන් අප සෙනාලි හමුවුණේ ඇයගේ නවතම තොරතුරු විමසා සිටින්නට.
‘සිරි පැරකුම්’ චිත්‍රපටයේ ඔබේ රංගනය ගැන මොන වගේ ප්‍රතිචාරද ලැබෙන්නේ?
චිත්‍රපටය නරඹන ගොඩක් දෙනෙක් මගේ රංගනය අගය කරල කතා කරනවා. චිත්‍රපටය තිරගත වන්න කලින් පවා චිත්‍රපටයට සම්බන්ධ අයගෙන් හොඳ ප්‍රතිචාර මගේ රංගනයට ලැබුණා. හැමෝම මගේ රංගන ජීවිතයට සුබ පතනවා.
මේ ඔබේ කීවැනි චිත්‍රපටය ද?
ම‍ෙග් පළමු චිත්‍රපටය.
‘සිරිපැරකුම්’ වැනි ඓතිහාසික කතාවක් රැගත් චිත්‍රපටයකින් රංගන ජීවිතය ආරම්භ කරන්න ලැබීම ගැන මොනවද හිතෙන්නේ?
මේක අපේ ‍රටේ ඉතිහාසයට සම්බන්ධ සත්‍ය කතාවක්. මගේ චරිතය සිරිමල් එතනා. ඇය තමයි පරාක්‍රමබාහු කුමාරයා අප්‍රකටව සිටින කාලයේ ඔහුගේ පෙම්වතිය. මෙවැනි චිත්‍රපටයකින් රංගන ජීවිතය ආරම්භ කිරීමට ලැබීම ව‍ෙග් ම ආචාර්ය සෝමරත්න දිසානායක මහතා වැනි අධ්‍යක්ෂවරයකුගේ නිර්මාණයකින් චිත්‍රපට රංගනයට එන්න ලැබීමත් වාසනාවක්.
මේ චිත්‍රපටයේ වැඩකරගෙන යද්දී ප්‍රවීණ ශිල්පීන්ගෙන් ලැබුණු සහාය?
ප්‍රවීණ කලාකරුවන් විශාල පිරිසක් එක්ක වැඩ කිරීමේ අවස්ථාව මට මෙහිදී ලැබුණා. මම කලා පවුලකින් එන කෙනෙක් නිසා මේ ප්‍රවීණයින් මට නුහුරු නුපුරුදු අය නෙමෙයි. හැබැයි මීට කලකට පෙර මම ඔවුන් දෙස බැලුවේ ප්‍රේක්ෂකයෙක් විදියට. මේ චිත්‍රපටයේ වැඩ කරන විට ඔවුන් මට ගොඩක් සමීප වුණා.
ඒ වගේ ම විශාල සහයෝගයක් ලබා දුන්නා. රංගනය ගැන, මේ වෘත්තීය ගැන ගොඩක් ඒ උපදෙස් මට ගොඩක් වටිනවා.
කොහොමද ඔබ මේ චිත්‍රපටයට සම්බන්ධ වුණේ?
මාව මේ චිත්‍රපටයට තෝරා ගනිද්දි මම හිටියේ එංගලන්තයේ. දැනට අවුරුදු 10 ක ඉඳල මම පදිංචිය එංගලන්තයේ. මම එහේ ඉගෙන ගන්නවා. මේ චිත්‍රපටයට රංගන ශිල්පීන් ගන්නා බව පුවත්පතකින් දැනගන්න ලැබුණා.
ඊට පස්සෙ මම මගේ විස්තරයි ඡායා රූපයකුයි රේණුකා බාලසූරිය මහත්මියට එව්වා. ඒ අනුව මාව චිත්‍රපටයට තෝරා ගත්තත් සෝමරත්න දිසානායක මහතාට පුංචි සැකයක් තිබුණා අවුරුදු 10 ක් තිස්සේ එංගලන්තයේ ජීවත්වන මට, 13 වැනි ශතවර්ෂයේ ලංකාවේ ජීවත් වුණු චරිතයක් නිරූපණය කරන්න පුළුවන් වේවිද කියලා.
ලංකාවට ඇවිත් සෝමරත්න අංකල් ඉදිරියේ මම ඒ චරිතය නිරූපණය කළා. එවිට තමයි ඔහු මා ගැන නිවැරදි තීරණයකට ආවේ. ඒ විදියටයි මම “සිරිපැරකුම්” චිත්‍රපටයට සම්බන්ධ වුණේ.
ඔබ කොහොමද මේ චරිතයට සූදානම් වුණේ?
මූලික වශයෙන්ම මේ චරිතය ගැන හොඳ අවබෝධයක්, සෝමරත්න අංකල්ගෙන් මට ලැබුණා. ඊට අමතරව පරාක්‍රමබාහු කුමාරයා ගැනත් ඒ යුගය පිළිබඳවත් ලියවුණු පොත් මම කියෙව්වා.
ඒ වගේම මට හම්බ වුණා සිරිමල් එතනා ගැනම ලියවුණු පොතක්. ඒ පොතෙන් මට මේ චරිතය ගැන හොඳ අවබෝධයක් ආවා. ඒ විදියටයි මම මේ චරිතයට සූදානම් වුණේ.
ඔබ පුංචි කාලෙත් කලාවට සම්බන්ධ වෙලා සිටියද?
මීට අවුරුදු 10 කට ඉස්සර සිරස නාළිකාවේ “පුංචි පැංචි” වැඩසටහන ඉදිරිපත් කරන්න මම දායක වුණා. ඊට අමතරව ටෙලිනාට්‍ය කීපයකත් රඟපාල තියෙනවා.
ඔබ රංගනයට ආවේ ඔබේ පවුල් පසුබිම නිසාද?
මේ ක්ෂේත්‍රය මට අමුතු තැනක් නෙමෙයි. මගේ නැන්දා (මාලිනී ෆොන්සේකා) මගේ අනෙක් නැන්දලා අක්කල රඟපානව දැකල මටත් ආශා හිතුනා රංගනයට එන්න. ඉතින් අහම්බෙන් වගේ ඒ ආශාව ඉටුවුණා. මගේ අම්මගේ සහෝදරයෙක් වන අශෝක සෙනරත් මුදලිගේ මාමා මට ගොඩක් උදව් කළා.
ඔබ එංගලන්තයේ මොනවද කරන්නෙ?
මම මූලික අධ්‍යාපනය ලැබුවේ එංගලන්තයේ. ලබන අවුරුද්දේ මම විශ්වවිද්‍යාලයට ඇතුළත් වෙනවා. Bio medical science ඉගෙන ගන්න. මම එංගලන්තයේ හිටියට ලංකාවට හරිම ආදරෙයි.
එතකොට ඔබ රංගනයට සම්බන්ධ වෙන්නේ විනෝදාංශයක් හැටියටද?
විනෝදාංශයක් හැටියට කලා කටයුතුවල යෙදෙන්න මම කැමැති නෑ. ඒ මොකද විනෝදාංශයක් ලෙස කරන දෙයකින් හොඳ දෙයක් කරන්න බැරි නිසා. රංගනය කියන්නෙ කැපවීමකින්, අභ්‍යාස කිරීමකින් ප්‍රගුණ කරන්න ඕන ‍ දෙයක්.
අනාගත යේදී මම ඉගෙන ගන්නා විෂයෙන් ඉදිරියට යන ගමන් කලා ක්ෂේත්‍රයේත් රැ‍ඳෙන්න උත්සාහ කරනවා. කරන දේ වෙනුවෙන් උපරිම කැප කිරීමක් කරන්න මම සැම විටම උත්සාහ කරනවා.
ඔබේ පවුලේ විස්තරත් කියන්න?
මගේ තාත්තා උපාලි ෆොන්සේකා. අම්මා සේනානි ෆොන්සේකා. නැන්දා මාලිනි ෆොන්සේකා. මම තමයි පවුලේ එකම දරුවා. අපි ඉන්නෙ එංගලන්තයේ. මගේ අම්ම එයාගෙ රැකියාවෙන් පවා අයින්වෙලා මගේ වැඩවලට උදව් වෙනවා. තාත්තත් මගේ ළඟින්ම ඉන්නවා.
අවුරුදු 10 ක් තිස්සේ එංගලන්තයේ ජීවත් වුණත් ඔබට හොදින් සිංගල කතා කරන්න පුවවන් නේද ?
ඔව් මට හොදට සිංගල කතා කරන්න පුලුවන්.
එංගලන්ත‍ෙය් ජීවත් වුණාට මට මගේ මව් බස අමතක නෑ.
READ MORE - ඇය සෙනාලි

සැමුවෙල් රුද්‍රිගු මාවත නම ඉවත් කිරීම පිළිකුලෙන් යුතුව හෙළා දකිනවා

සැමුවෙල් රුද්‍රිගු මාවත නම ඉවත් කිරීම පිළිකුලෙන් යුතුව හෙළා දකිනවා

කැලණිය ප්‍රදේශීය සභාව මඟින් අභාවප්‍රාප්ත විශිෂ්ට කලාකරුවකු වූ සැමුවෙල් රුද්‍රිගු මහතා නමින් නම් කළ මාවත වෙනස් කරලීම මෙරට සංස්කෘතියට කළ මහත් නිගාවකැයි සබරගමු විශ්වවිද්‍යාලයේ කුලපති මහාචාර්ය අග්‍ර මහා පණ්ඩික කුඹුරුගමුවේ වජිර හිමිපාණන් සරසවිය පුවත්පතට පැවසුවේය.
මෙරට ජීවත් වූ කලාකරුවකු වූ සැමුවෙල් රුද්‍රිගු මහතාගේ නමින් කැලණිය ගල්බොරැල්ල ඒ මහාත ජීවත් වූ පෙදෙස නම් කොට තිබූ අතර පසුගියදා කැලණිය ප්‍රාදේශීය සභාව මඟින් අත්තනෝමතිකව එම පුවරුව ඉවත් කර තිබිණි. මේ පිළිබඳව සරසවිය පුවත්පතට හිමිපාණන් අදහස් දැක්වූයේ මෙපරිද්දෙනි.
සැමුවෙල් රුද්‍රිගු මතතා ජීවත්ව සිටියදී අගනා කලාකරුවෙක් ලෙස නමක් දිනා සිටි කෙනෙක්. එමෙන්ම දේශය අලංකාර කළ, මිනිසුන්ට නිර්ව්‍යාජ ක්‍රමවේදයකින් හාස්‍ය ඉස්මතු කරලා, විශාල සේවාවාක් කළ තැනැත්තෙක්. සැමුවෙල් රුද්‍රිගු මහත්මාගේ විනෝද සමය බිහි වුණෙත්, පුහුණු වුණෙත් විද්‍යාලංකාර පිරිවෙන් බණ මඩුවේ.
ඒ වගේම කෙතරම් හාස්‍ය මතුªකළත් ඉතාම අවංකව ආගමික කටයුතුවල යෙදුනු ගරු කටයුතු මහත්මයෙක්. කැලණිය රජ මහා විහාරයේ බණ අසන්නට යන එතුමන් මතුවන ධර්ම ගැටළු නිරන්තරයෙන් මා සමඟ සාකච්ඡා කළා.
ගල්බොරැල්ලේ බෝධිරුක්ඛාරාම විහාරස්ථානයට ඉඩකඩම් පූජා කර තිබුණේ ඒ මහත්මයාගේ පවුලේ ඥාතීන්. කාලයක් ජරාජීර්නව තිබුණු මේ විහාරස්ථානය මට බාර දෙන්නට කටයුතු කළෙත් එතුමන්. අද එය බෞද්ධ මධ්‍යස්ථානයක් දක්වා දියුණු කරන්නට ලැබුණේ එතුමන් නිසයි.
2005 වසරේදී එතුමන්ගේ නමින් මේ මාවත නම් කරන්නට කටයුතු යෙදුණේත් ඒ අනුවයි. ඇත්ත වශයෙන්ම මිය ගිය තැනැත්තන්ට ගෞරව කිරීමයි අපේ සිරිත. එහෙත් එය නොසලකා කටයුතු කිරීම අපේ සංස්කෘතියට නිගා කළ තීන්දුවක්.
බුදුරජාණන් වහන්සේ ගේ පාද ස්පර්ශය ලබපු කැලණිය, කැලණි විහාරයට මෙන්ම විද්‍යාලංකාර පිරිවෙණට දායකත්වය දරපු මේ නිර්ව්‍යාජ කලාකරුවන්ට කළ අපහාසය මේ රටටම කළ අපහාසයක් හැටියටයි මට හැඟෙන්නේ. විශේෂයෙන් මේ මාවතේ නම වෙනස් කිරීම මිය ගිය කෙනෙකුට ගෞරව දක්වන්නට පුරුදු වුණු ජාතියක් වන අප අතින් සිද්ධ නොවිය යුතු දෙයක්. මා එය දැඩි සේ පිළිකුල් කොට හෙළා දකිනවා’.

සබරගමු විශ්වවිද්‍යාලයයේ කුලපති,
මහාචාර්ය අග්‍ර මහා පණ්ඩිත
කුඹුරුගමුවේ වජිර හිමි  

READ MORE - සැමුවෙල් රුද්‍රිගු මාවත නම ඉවත් කිරීම පිළිකුලෙන් යුතුව හෙළා දකිනවා

||| යං ||| ඔව්, අපි කුණුහරුප පත්තරයක් |||

Friday, June 14, 2013

යං

ඔව් ! අපි කුණුහරුප පත්තරයක් 

http://www.mawbima.lk/82-0-news-list.html 
අපිට දැන් ගොඩක් දේවල් පේන්නෙ කුණුහරුප විදියට. ඒ මේ සිස්ටම් එකේ හැටි. සොසේජස් ඉස්සරහ, කොස් කුණුහරුපයක්, අභීත දියණිය ඉස්සරහ ගමේ රේණුකා කුණුහරුපයක්. ඒක හරි ස්වාභාවිකයි.

පරණ භාවිතාවන් ඉස්සරහ, අලුත් දේවල් සමාජගතවෙන කොට ඒක ගොඩක් අයට පේන්නෙ කුණුහරුපයක් විදියට. යං කියන්නෙත් එහෙම ආඛ්‍යානයක්. මීට අවුරුද්දකට ඉස්සරහ අපි ඒ ආඛ්‍යානයට බොහෝ දේ සොයා බැලුවා. ලංකාවේ තාරුණ්‍යයට තිබෙන මුද්‍රිත මාධ්‍ය අතරෙ අපි කොහොමද අපේ ඉඩ වෙන්කරගන්නෙ කියලා. මුලින් මුලින්, ෆෝටි නෝටි ඇන්ටිලාගෙනුත් හදවතින් විතරක් නෙවෙයි කේශනාලිකාවලින්, ඇටමිදුළුවලින්ම වයසට ගිය අන්කල්ලාගෙනුත් කනපැළෙන්න බැනුම් තිබුණත් අපේ යං සමාජය අපේ ආඛ්‍යානය වැලඳ ගත්තේ පට්ට ආදරේකින්. කෙල්ලන්ට රේන්ද මහන්න - මල් මහන්න ඇන්තූරියම් වගා කරන්න කියන කාරණාවලට එහා ගිය කොල්ලන්ට සිල්ලර කතා ලියනවට එහා ගිය වෙන ලියවිල්ලක් අපි ගොඩනැඟුවා. කොටින්ම කියනවානම් අපිට වුවමනා වුණේ භාෂාවේ පොරිටික. එහෙමත් නැත්නම් රැස් ටික අපේ කුලකයට අරන්යන්න. ඉලෙක්ට්‍රොනික් මීඩියා, මෙච්චරටම හිට් කාලෙක අකුරුවලට තියෙන වටිනාකම් වැඩි වුණේ ඒ රැස් නිසා. අපිට ආපු සියලු බැරියර්වලට මුහුණ දෙන්න අපිට ශක්තියක් වුණේ අපේ ප්‍රධාන කර්තෘ වන තුෂාර ගුණරත්න මහත්මයා. ඒ වගේම උපුල් ජෝශප් ප්‍රනාන්දු මහත්මයා. ඒ දෙන්න නැත්නම් ජාතික පුවත්පතක අපට මෙච්චර හිතුවක්කාරකම් කරන්න බැරි වෙනවා.


කවුරු කොහොම කිවුවත් කවුරු කොහොම හිතුවත් අපේ යං සමාජය ගැන අපිට වගකීමක් තියෙනවා. ඒ වගකීම කවදාවත් අපි අමතක කරන්නෙ නෑ. මඟහරින්නෙත් නෑ. වෙළෙඳපොළ ඇතුළෙ කොල්ලො කෙල්ලො කියන්නෙ මාරම මාර්කටින් බේස් එකක්. ටෙලිවිෂන් එක දිහා පැයක් වාඩිවෙලා බලා හිටියොත් තරුණයා නිර්මාණය වන විදිය හිතාගන්න පුළුවන්. උගේ ඇඳුම් පැලඳුම්, කනබොන විදි, හෙයා ස්ටයිල්, වෙඩින් එක ගන්න විදි, ලව් කරන විදිය, පරණ කෑල්ලට වඩා ඊළඟ කෑල්ල රසයි කියන විදිය, අපිට බලාගන්න පුළුවන්. ඒ නිසාම ලස්සන ශරීර අපිට හැම තැනම දකින්න පුළුවන්. දැන් කොල්ලො කෙල්ලො පට්ට විදියට පැෂන් කරනවා. උන් ඇත්තටම ලස්සනයි. නමුත් අපිට වුවමනා වුණේ ඒ ලස්සන ශරීරයට අලුත් ඔළුවක් බද්ධ කරන්න. කෙටියෙන්ම කියනවනම් තමාගේ ප්‍රේමවන්තියට තරමට අනිත් සමාජයටත් පට්ට විදියට LOVE කරන සමාජයක් බිහිකරන්න අපට අවශ්‍යයි. ටෙලිෆෝන් නම්බරයක් විතරක් බවට පත් වුණු ජීවිතේ, අලුතෙන් මානව සම්බන්ධතා හදාගන්න කුලකයක් නිර්මාණය කරන්න අපට අවශ්‍යයි. ඒ සඳහා යං ජෙනරේෂන් එක අපි සූදානම් කරනවා.

ඒ අරගලයේ අලුත්ම ක්‍රියාදාමය තමයි අපේ Class එකට යං Program එක. Class එකට යං තුළත් ලංකාවෙ කෙල්ලො කොල්ලො ලක්‍ෂයකට අපි සෘජුවම කතා කරන්න බලාපොරොත්තු වෙනවා. අපි පටන් ගත්තෙ ගාල්ලෙන්. ඒ මැයි 21. ඊට පස්සෙ ජුනි මාසෙ 22 අපේ දෙවැනි Class එකට යං වැඩසටහන නුවර උපුල් ශාන්ත සන්නස්ගලගෙ Class එකේ සුහුඹුල් මානව මානවිකාවන් දෙදහසකගේ සහභාගිත්වයෙන් සිදුකරනවා. අපි එතැනදී LOVE ගැන, මානව සම්බන්ධතා ගැන, කවි, ගීත ගැන කතා කරනවා. ඒ වැඩසටහන කොතරම් ජනප්‍රියද කිව්වොත් ජූලි මාසෙ තිස්සමහාරාමයටත්, අගෝස්තු බළන්ගොඩත් පැවැත්වීමට දැනටමත් දින වෙන් වෙලා ඉවරයි. ඒ තැන්වලට ගියාම අපේ යං සමාජය අපිට කියන්නෙ ඔයාල පත්තරයක් නෙවෙයි ජීවිතයක් කියලා. ඒ තරමටම ඔවුන්ට අපි ළංවෙලා.


ඔව්... අපි දේශපාලනිකයි. ඒ දේශපාලනයේ පරමාදර්ශය ආදරය පමණයි. ඒ වෙනුවෙන් අපි පෙනී සිටිනවා. අරගල කරනවා. ලංකාවේ බහුතරයක් අම්මල තාත්තලාට වැටහෙන්නෙ නැති බහුතරයක් සුචරිතවාදීන්ට වැටහෙන්නෙ නැති මේ කුණුහරුපය අපේ යං සමාජය ආදරයෙන් වැලඳගන්නවා. අපේ කුලකය අපිත් එක්ක යං.


ජයවේවා!
සංජක ප්‍රසාද් ‍ෙදාලේවත්ත


READ MORE - ||| යං ||| ඔව්, අපි කුණුහරුප පත්තරයක් |||

භාග්‍යාගේ පරණ මතකය

භාග්‍යාගේ පරණ මතකය
භාග්‍යා හෙට්ටිආරච්චි ජනප්‍රිය යොවුන් නිළියක් ලෙස හඳුන්වන්න පුළුවන්. නමුත් කලා ක්ෂේත්‍රයේ හුඟ දෙනෙක් නොදන්න කරුණක් තමයි ඇය ගායනයට බොහෝ සෙයින් දක්ෂ බව.
භාග්‍යා සංගීතය ප්‍රගුණ කළේ ආචාර්ය ප්‍රේමසිරි කේමදාසයන් යටතේයි. කේමදාස මාස්ටර් ගේ ඔපෙරාවන්හිත් භාග්‍යා සිය දක්ෂතා විදහා පෑවා.
පසුගිය දිනෙක ඇගේ සංගීත දිවියේ අපූරු මතකයක් ගැනත් භාග්‍යා අපිත් එක්ක පවසා සිටියා. “කේමදාස සර් හැමදාමත් කැමැතියි වෙලාවට වැඩ කරන්න. අපේ සංගීත පන්ති පැවැත්වුණේ කොළඹ ජනකලා කේන්ද්‍රයේ දීයි.
ඇත්තටම කේමදාස සර් යටතේ ගෙවුණු ඒ කාලය හරිම සුන්දරයි. විනෝදජනකයි. සර් කැමති නැහැ. ශිෂ්‍ය ශිෂ්‍යාවෝ පරක්කු වෙලා පන්තියට එනවට. මං හැමදාමත් පන්තියට එනකොට පරක්කු වෙනවා. ඉතින් මාව දැක්කහම සර් බනිනවා. ඒ හින්දා පස්සේ පස්සේ මම කරන්නේ ජනකලා කේන්ද්‍රයේ පන්ති පැවැත්වෙන හෝල් එකේ ජනේලයෙන් පැනලා පන්තියට ඇතුල් වෙන එක. පන්තියේ ළමයි වටවෙලා ඉන්න විට සර්ට ජනේලය පේන්නේ නැහැ.
ඇත්තටම ඒ කාලේ හරිම සුන්දරයි. ‍ෙප්‍ර්මසිරි කේමදාස වැනි මහා සංගීතඥයෙකු ගෙන් සංගීතය හදාරන්න ලැබීම මං ලැබූ වාසනාවක් ලෙසයි මම සලකන්නේ. එතුමා ලබාදුන් සංගීත ඥානයෙන් ඉදිරියේ දී උපරිම ප්‍රයෝජන ලබාගෙන ගායන අංශයෙනුත් ඉදිරියට යන්නට මම උත්සාහ කරනවා.
READ MORE - භාග්‍යාගේ පරණ මතකය

ඩොක්ටර්, මට කාර්, පාරේ යනවා දැක්කම බුරන්ඩ හිතෙනවා

පුහුණුවේ තරම

’තව ටික දොහකින් දර්ශන පුහුණුවකට ඉන්දියාවේ යනවනෙ. එතකොට විශ්ව විද්‍යාලෙ නිවාඩුව ඉවර වුණාම ප්‍රමෝද් සබරගමු යනවා. ඔයා උදේට හොඳටෝම දවල් වෙලා නැගිටලා අන්තිම මොහොතේ ලැහැස්ති වුණාම, කවුද නිරාශා, ඔයාව කාර් එකෙන් බැංකුවට ගිහින් ඇරලවන්නෙ? ඒකනෙ ළමයො මම ඔයාට කිව්වේ ඉක්මනට ඩ්‍රැයිවින් පුරුදු වෙන්නෙයි කියල.’ ශාන්ති තම දියණියට එසේ කීවේ වාහන පැදවීමට අකැමැති තම සැමියා දෙස සාවඥ බැල්මක් හෙළමිනි.
’ඉතින් අම්මට පුළුවන්නෙ, කාරෙක එළවාගෙන යන්ඩ. ඇයි අම්මාට තියෙන්නෙ බරවාහන ලයිෂන් එකක් නේද?’ ප්‍රමෝද් ඇසුවේ සිනාසෙමිනි.
’ඔව්, උඹලගෙ අම්මට ඒක කරන්ඩ බැරිකමක් නැහැ. හැබැයි පුතෝ එතකොට මට සිද්ධවෙනවා අර බයිසිකල් රේස් තියෙන වෙලාවට කෙරෙන්නා වගෙ, වාහනයකට ලවුඩ්ස්පීකරයක් බැඳගෙන කෑගහ ගහා යන්ඩ, පාරේ යන මිනිස්සුන්ටයි, වාහන වලටයි වහාම පාරෙන් ඉවත් වෙන්ඩ කියල.’ චන්ද්‍රසිරි කීවේය.

වාසනාව

’මේක නං හරිම පුදුමයක් අනේ. අපේ අම්මා ඔය ටීවී එකේ යන කුකරි වැඩසටහන් බලලා අලුත් කෑමක් හැදූ දවසටමයි මට බැංකුවේ මොකක් හරි පාටි එකක් යෙදිලා දවල් කෑම එපා කියල අම්මට කියන්න සිද්ධ වෙන්නෙ. එක අතකට ඒත කොයිතරං වාසනාවක්ද, නේද?’ අකිලා තමා සමඟ බැංකුවේ සේවය කරන දක්‍ෂිණා සමඟ කීවේ තේ බොමින් සිටියදීය.
’මොකක්ද අනේ ඒකෙ තියෙන වාසනාව? ඒකෙන් වෙන්නෙ අම්මා හදන රස කෑම කන්ඩ ඔයාට නොලැබෙන එකනෙ.’ දක්‍ෂිණා පුදුම වෙමින් කීවාය.
’ඒක ම තමයි වාසනාව ළමයො. ඒවා කාලා බඩ නරක්වුණාම මම කොහොමද පහුවැනිදට බැංකුවේ රාජකාරි කරන්නෙ?’ අකිලා සිනාවෙමින් විමසුවාය.

කොච්චර කල්ද?

අජිත් තමා සුනඛයෙකැයි තරයේ අදහමින් සුනඛයකු විලසින් හැසිරෙන්නට වූයෙන් ඔහුගේ බිරිය ඔහු වෛද්‍යවරයකු වෙත රැගෙන ගියේය.
’ඩොක්ටර්, මට කාර්, පාරේ යනවා දැක්කම බුරන්ඩ හිතෙනවා. කෑම පිඟාන බිම තියලා නැමිලා හොම්බ පිඟානෙ අතුල්ල අතුල්ලා කෑම කන්ඩයි මම කැමැති. මම චූ කරන්නෙත් එක අණ්ඩක් උස්සගෙන.’ අජිත් වෛද්‍යවරයා හමුවේ කියවාගෙන ගියේය.
’මිස්ටර්ට මේ විදියට හිතෙන්ඩ වෙලා දැන් කොච්චර කාලයක් වෙනවද?’ වෛද්‍යවරයා නළල රැළිගන්වමින් ඇසීය.
’මම පැටියා කාලෙ ඉඳලා ඩොක්ටර්.’ අජිත් ඉව අල්ලමින් කීවේය.

ඉහළම ප්‍රයෝජනය

’මිස්ටර් රන්ජිත්, ඔයාගෙ අලුත් සීඩී එකෙන් මම ඉහළම ප්‍රයෝජනයක් ගත්තා.’ ශ්‍රවණාගාරයේ පැවති රැස්වීම අවසානයේ චන්දිමා, රන්ජිත් හට කීවේ සිනාසෙමිනි.
’ඇත්තද? ඒ කියන්නෙ ඒකෙ තියෙන සින්දු ටික හොඳටෝම රස වින්ඳා?’ රංජිත් ඇසුවේ ආඩම්බර සිනාවක් මුවඟට නංවා ගනිමිනි.
’එහෙම දෙයක් නෙමෙයි. අපේ ගේ පිටිපස්සෙ බොහොම සරුවට හැදුණු කෙහෙල් පඳුරක් තියෙනවා. පහුගිය දවස්වල දෙමලිච්චෝ රංචුවක් ඒ කෙහෙල් පඳුර වටේ පහුරු ගාන්ඩ පුරුදුවෙලා, උන්ව එළවා ගන්ඩ විදියක් නැතුවයි මම හිටියේ. අපෙ හස්බන්ඩ්ගෙ කීමට මම ඔයාගෙ සී.ඩී. එක නූලකින් ඒ කෙහෙල් පඳුර ළඟ එල්ලුවා. දැන් එක දෙමලිච්චෙක් වත් ඒ කිට්ටුවට එන්නෙ නැහැ.’ චන්දිමා පැහැදිලි කළාය.

ඇයි ඇහුණේ නැද්ද?

’හෙට උදේ වෙනකොට මේ වැස්ස හොඳටෝම පායයි.’ නොකඩවා ඇද හැලෙන මහ වැස්ස නිසා සීතලක් දැනුණු කීර්ති දෑත් පොරවා ගනිමින් තම බිරියට ඇසෙන සේ ස්ථිර ස්වරයකින්, උස්හඬින් කීවේ දෑස් කරකවා ඇය දෙස බලමිනි.
’දැන් දවස් දෙකක් තිස්සෙ ඉවරයක් නැතුව එක දිගටම වහින මේ වැස්ස නවතිනවා කියල ඔය තරම් ෂුවර් කරලා කියන්නෙ, ඇත්තටම ඔයාට ඔල්මාදෙ ද?’ මාධනී ඇසුවේ තම සැමියාගේ තකතීරු කතාවටත් වඩා ඔහු එය කී විසුළු ස්වරූපය දැක කෝප වෙමිනි.
’ඇයි ඔයා රේඩියෝ එක අහගෙන නේද හිටියේ. දැන් ටිකකට කලින් කාලගුණ විද්‍යා දෙපාර්තමේන්තුවෙන් කිව්වේ මේ වැස්ස තව සුමානයක් දිගටම පවතිනවයි කියල.’ කීර්ති කීවේය.

Silumina
READ MORE - ඩොක්ටර්, මට කාර්, පාරේ යනවා දැක්කම බුරන්ඩ හිතෙනවා

ඔය දෙන්නා දැන් ඉතින් විවාහ වෙන්න

ක්ලැරන්ස්ගේ පැමිණීමෙන් අපේ කණ්ඩායමට ලොකු වටිනාකමක් එකතු වුණා

ලාංකිකා පෙරේරා
ලාංකිකා පෙරේරා - චානක පෙරේරා ප්‍රමුඛ ‘ගෝල්ඩන් චයිම්ස්’ සංගීත කණ්ඩායම, මේ වසරේ සිය අභිමානවත් 42 වැනි සංවත්සරය සමරයි.
දශක හතරක් ඉක්ම ගිය ඔවුන්ගේ සංගීත කණ්ඩායම සහ සංගීත ජීවිතය පිළිබඳ ලාංකිකා සමඟ මේ කතා බහ පෙළ ගැසෙනුයේ, ඒ නිමිතිකොට ගෙනයි.
අවුරුදු 42 ක් ගතවෙලත් ‘ගෝල්ඩන් චයිම්ස්’ කණ්ඩායම තවම කාර්ය බහුලයි...
ඇත්තටම ඒ ගැන අපිට තියෙන්නෙ සියුම් ආඩම්බරයක්. මොකද අවුරුදු 42 ක් ම නොකැඩී පවත්වාගෙන ආ සංගීත කණ්ඩයමක් අපි. ඒකට ප්‍රධාන හේතුව තමයි පවුලක් හැටියට මාත් චානකත් ආ මේ ගමන. අදටත් ඕනෑම ප්‍රසංගයකදී අපේ ඒ පවුලේ කැපවීම තිබෙනවා.
අනික මගේ අයියා විජිත්, දැන් කණ්ඩායමේ නැති වුණාට ඔහු ගෝල්ඩන් චයිම්ස් හි ආරම්භක ඩ්‍රම්ස් වාදකයා. චානක, ආරම්භක බේස් ගිටාර් වාදකයා.
අපේ කණ්ඩායමේ එදා පටන් ම එකම නිත්‍ය ගායිකාව මම. ඒ වගේ ම ක්ලැරන්ස් සම්බන්ධවීමත් සමඟ අපේ සංගීත කණ්ඩායමට ලොකු වටිනාකමක් එක් වුණා.
ක්ලැරන්ස්ගේ මුණ ගැසීම සිදුවුණේ...
චානක සහ මගේ අයියා ‘බීකන්ස්’ කණ්ඩායමේ වැඩ කළ කාලයේ. ඔවුන් බටහිර ගීත ගැයූ, ඉලෙක්ට්‍රික් ගිටාර් පාවිච්චි කළ සංගීත කණ්ඩායමක්. දවසක් චානකත් මගේ අයියාත් ‘ප්ලේ’ කළ මඟුල් ගෙදරකම ක්ලැරන්ස් සහ ඇනස්ලි ආරාධිතයන් හැටියට ඇවිත් තිබුණා. පසුව ඔවුන් ගීත ගායනා කරද්දී තමයි චානකලා එක්ක බොහොම හිතවත් වෙලා තියෙන්නෙ. එතකොට තමයි ක්ලැරන්ස්ට හිතිලා තියෙන්නෙ මේ ‘ස්ටයිල්’ එකට ඉලෙක්ට්‍රික් ගිටාර් වාදනයත් කණ්ඩායම් සංගීතයට යොදා ගත්තොත් හොඳයි කියලා. මොකද ඒ වෙනකොට කිසිම කෙනෙක් බොක්ස් ගිටාර් හැරෙන්නට කණ්ඩායම් සංගීතයට ඉලෙක්ට්‍රික් ගිටාර් යොදා ගත්තෙ නැහැ. ක්ලැරන්ස් ඒ පාර තමයි අයියටයි චානකටයි ආරාධනා කළේ.
ඔවුන් ඔහු වැඩ කළ ‘මූන්ස්ටෝන්ස්’ කණ්ඩායමට එක්වෙලා අවුරුදු තුනකට වඩා එකට වැඩ කළා. ඊට පස්සෙ 1969 තමයි, ක්ලැරන්ස්, චානක සහ මගේ අයියා ‘මූන්ස්ටෝන්ස්’ කණ්ඩායමෙන් ඉවත් වෙලා ‘ගෝල්ඩන් චයිම්ස්’ කණ්ඩායම හැදුවේ. එතකොටත් ක්ලැරන්ස් අපි එක්ක අවුරුදු තුනක් විතර වැඩ කළා. අපෙන් අයින් වෙලා වෙන සංගීත කණ්ඩායමක් හැදුවා කියලා ඔහුත් සමඟ තිබූ අපේ හිතවත්කම ඔහු මියෙන තුරුම අබමල් රේණුවක් තරම් හෝ අඩු වුණේ නැහැ. අදටත් ක්ලැරන්ස්ගේ බිරිය ශීලා සහ දුව අපි එක්ක හිතවත්කම් සම්බන්ධතා පවත්වනවා.
‘ගෝල්ඩන් චයිම්ස්’ හා ඔබේ සම්බන්ධය ඇති වන්නේ...
ක්ලැරන්ස් රත්නපුරේ කෙනෙක් නිසා අයියයි චානකයි එක්ක වැඩ කරන්න ගත්තට පස්සේ අපේ ගෙදර නතර වුණා. සංගීත පුහුණුවලට වගේ ම මාව බලන්නත් එක්ක චානකත් හැමදාම හවසට අපේ ගෙදර ආවා.
එහෙම ආව වෙලාවට අපි දෙන්නා කළේ එයා ගිටාර් එක වයද්දි මං ගායනා කළ එක. අපි දෙන්නගේ මේ වැඩේ දැකපු ක්ලැරන්ස් කිව්වා, ‘ආයේ මොකටද පිටින් ගායිකාවක් හොයන්නේ. මේ ඉන්නෙ ගෙදරම කෙනෙක් කියලා. බෑන්ඩ් එක පටන් ගත්තට නමක් දාලා තිබුණෙ නැහැ. සූරිය ලේබල් අධිපති ජෙරල්ඩ් වික්‍රමසූරිය තමයි ‘රන් සීනු හඬ’ අර්ථය ඇති ‘ගෝල්ඩන් චයිම්ස්’ නම දැම්මේ. ඒ 1970 දී.
ඒ වෙනකොටත් කණ්ඩායමට බැඳෙන්න මගේ කිසිම අදහසක් තිබුණෙ නැහැ. නමුත් ක්ලැරන්ස් ගෙ උනන්දුව නිසා බෑන්ඩ් එකට මං නිත්‍ය වශයෙන් එකතු වුණේ 1971 මුල දී. අපිට රටේ විවිධ පළාත්වල ප්‍රසංග ලැබුණා. බොහොමයක් ප්‍රසංග තියෙන්නෙ රෑට. ඒකට මගේ අම්මලා තාත්තලා ටිකක් අදිමදි කළා. ඊට පස්සේ මගේ තාත්තා කිව්වා, ‘ඔය දෙන්නා දැන් ඉතින් විවාහ වෙන්න...’ කියලා.
1971 දෙසැම්බර් පළමු වැනිදා. අපි විවාහ වුණා. ඒ චානකගේ උපන් දිනය දවසෙ. එදා රාවතාවත්ත මෙතෝදිස්ත දේවස්ථානයේ අපේ මංගල දිව්‍ය පූජාව වෙලාවේ ගායනා කරන්න ක්ලැරන්ස් හදලා දීපු, රන් සීනු හැඩ වී රිදී සීනු හැඬවී - ආදරයට මැදිවී දෙහදක් එක්වුණා...’ ගීතය පසු කලෙක තැටි ගත කළාම අතිශය ජනප්‍රිය වුණා.
එදා මංගල දිව්‍ය පූජාවේ මේ ගීතය ගායනා කළේ ‘ලාබම්බාස්’ සහ ‘ගෝල්ඩන් චයිම්ස්’ කණ්ඩායම එක්වෙලා. කොහොම හරි විවාහයෙන් පස්සෙ තමයි, මගේ ගායන ජීවිතය කාර්ය බහුල වුණේ.
පෝෂණය වුණේ. කණ්ඩායම් සංගීතයට රසිකයන් අතිශය ලෙස බැඳිලා හිටි යුගයක් නිසා අපිට රටපුරා හරියට ‘ෂෝස්’ තිබුණා. අනික මම ළාබාල වයසින් විවාහ වෙච්චි නිසයි මේ තරම් දුර ගමනක් සාර්ථකව එන්න පුළුවන් වුණේ.
එහෙත් ඔබ වෘත්තියෙන් බැංකු නිලධාරිනියක්...
දැන් මම බැංකු සේවයෙන් විශ්‍රාම අරන්. ඒත් අවුරුදු 39 ක් මං ලංකා බැංකුවේ සේවය කළේ ඉතාම සතුටින්. තෘප්තියෙන්.
විවාහයත් එක්කමයි මට බැංකුවේ රස්සාව ලැබුණෙත්. ඒ වෙලාවෙ මං ටිකක් බය වුණා. දැන් කොහොමද මං කණ්ඩායමත් එක්ක වැඩ කරන්නෙ කියලා. ඒත් චානකත් හිටි නිසා කිසිදු ප්‍රශ්නයක් නැතිව ප්‍රසංගවලට නොකඩවා සහභාගි වුණා.
උදේ ඉඳන් හවස් වෙනකල් රැකියාව කරලා රාත්‍රියේ තමයි මං ප්‍රසංගවලට ගියේ. ආවේ පාන්දර හතරට වුණත් උදේ ලෑස්තිවෙලා ආයේ වැඩට ගියා.
අවුරුදු 39 කට පස්සෙ රැකියාවෙන් විශ්‍රාම ගන්නදා මං මගේ ආයතනයේ සියලුම සහෘදයන් වෙනුවෙන් ප්‍රසංගයක් කරලයි සමුගත්තෙ.
බැංකු ජීවිතය අදත් මට බොහොම මිහිරි අතීතයක්.
ඒ, සංගීත ජීවිතය නිසා මං කවදාවත් රස්සාව අවුල් කර ගත්තෙ නැති නිසා.
ඉනෝකා පෙරේරා බණ්ඩාර
READ MORE - ඔය දෙන්නා දැන් ඉතින් විවාහ වෙන්න

තනිය මකන්න තවම කවුරුත් හම්බ වුණේ නෑ

තනිය මකන්න තවම කවුරුත් හම්බ වුණේ නෑ

 ආශා එදිරිසිංහ
වසරේ ජනප්‍රියතම ටෙලිනාට්‍ය නිළියට හිමි සම්මානයට හිමිකම් කීමට ලැබීමට තරම් ඇය වාසනාවන්ත වූවා ය. ඇය රංගන ශිල්පිනියක් මෙන් ම දක්ෂ රූපවාහිනී නිවේදිකාවක ද වන්නීය. ඇය ආශා එදිරිසිංහ. ආශාට ලැබුණු මෙම අගනා සම්මානය පිළිබඳවත් ඇයගේ නවතම කලා තොරතුරු පිළිබඳවත් අපි ඇයගෙන් විමසා සිටියෙමු.
ජනප්‍රියතම නිළියවිමේ සතුට දැන ් ඔබට දැනෙන්නේ කොහොමද?
මේ මගේ කලා ජීවිතයේ ලැබුණු පළමු සම්මානය, හදවතින් ම නැඟෙන ඉතාම අහිංසක සතුටක් මම දැන් විඳිනවා.
මෙම සම්මානය ලැබෙයි කියන විශ්වාසයත් බලාපොරොත්තුවත් තිබුණා ද?
ඇත්තෙන් ම එහෙම කිසිම විශ්වාසයක් බලාපොරොත්තුවක් මට තිබුණේ නෑ. ජනප්‍රියම නිළියන් තිදෙනා අතරේ මම ඉන්න බව මට දැනගන්න ලැබුණේ කතරගම ප්‍රදේශයේ ‘අළු බඳුන’ ටෙලිනාට්‍යයේ රූපගත කිරීම්වල යෙදිල ඉන්න විටයි. ඒ සති දෙක මම ගතකළේ කතරගම.
සම්මානය ගන්න වේදිකාවට ගොඩ වනවිට ඔබට දැනුණු හැඟීම...?
මට මේ දැනුත් ඒ සිදුවීම මතක් වෙනවා. විශාල සතුටකින් මගෙ හිත පිරිල තිබුණා. ඒ වගේ ම පුංචි තැති ගැම්මකුත් තිබුණා.
මෙම සම්මානය ඔබට හිමිවීම පිළිබඳ ඔබ ස්තුතිවන්ත වෙන්නෙ කාටද?
මම පළමුවෙන් ම ස්තුතිවන්ත වෙන්නෙ මගෙ අම්මටයි තාත්තටයි. ඒ මොකද ඔවුන් මට රංගනයට එන්න ඉඩ දුන්නට. විශේෂයෙන් ම මගේ තාත්තා කැමැති වුණේ නෑ මම රංගනයට එනවට. ඒ වගේ ම මගේ මේ සම්මානයේ අයිතියෙන් වැඩි කොටසක් ස්වාධීන රූපවාහිනියට හිමියි. ස්වාධීන රූපවාහිනියේ ජනප්‍රියත්වය නිසාම තමයි මට මේ සම්මානය හිමිවුණේ. ඒ නිසා ස්වාධීන රූපවාහිනි ආයතනයේ ගරු සභාපතිතුමා ඇතුළු කාර්ය මණ්ඩලයට මම ස්තුතිවන්ත වෙනවා. ඒ වගේ ම මට එස්.එම්.එස්. මනාප ලබාදුන් මගේ රසික පිරිසටත් මම ස්තුතිවන්ත වෙනවා.
මේ ලැබුණු සම්මානය ඔබට බරක් ද? කොහොමද ඔබ මේ ලැබුණු ජනප්‍රියත්වය ආරක්ෂා කරගන්නේ?
මේ ලැබුණු සම්මානය මගේ හිතට බරක් කියල මම හිතන්නේ නෑ. මම හිතන්නේ ඒක මගේ හිතට විශාල ශක්තියක් කියලයි. ඒ වගේ ම මෙය මාව තව තවත් ධෛර්යට පත් කරන සම්මානයක්. ඒ වගේ ම ප්‍රේක්ෂකයින් මාව ජනප්‍රියම නිළිය ලෙස අභිෂේක කිරීම මට විශාල අභිමානයක්. මම විශ්වාස කරන දෙයක් තමයි ‘අළු බඳුන’ ටෙලිනාට්‍යයේ මගේ රංගනය මේ සම්මානයට හේතු වුණා කියන එක. ඒ නිසා ඉදිරියේදීත් මම ගුණාත්මක හොඳ නිර්මාණවල රැඳෙන්න ඕන කියන හැඟීම මට තියෙනවා.
ඔබ දැන් ජනප්‍රියම නිළිය වුණා. දක්ෂතම නිළිය වෙන්න බලාපොරොත්තුවක් නැති ද?
රංගන ශිල්පියෙකුගේ හෝ ශිලිපිනියකගේ එකම බලාපොරොත්තුව තමයි දක්ෂතම නිළියට හිමි සම්මානයට හිමිකම් කීම, ඒ සඳහා දක්ෂතාව වගේ ම වාසනාවත් තියෙන්න ඕන. ඒ සඳහා මම මගේ ජීවිතයට තව තවත් විශාල වශයෙන් අත්දැකීම් එකතුකර ගන්න ඕන. එම සම්මානය සඳහා මම තවම ඉන්නේ පළමු අදියර කියලයි මම හිතන්නේ.
ඔබ මොනවද මේ දිනවල කරන්නේ?
අපේ නිෂ්පාදනයක් වන ‘අළු බඳුන’ ටෙලි නාට්‍යයේ රූපගත කිරීම්වලට සහභාගි වෙනවා. ඊට අමතරව ස්වාධීන රූපවාහිනියේ ‘හීන හතයි’ වැඩසටහන ඉදිරිපත් කරන්න දායක වෙනවා.
ඔබේ ටෙලිනාට්‍ය නිෂ්පාදනය කරන ආයතනයෙන් ඇයි ‘අළු බඳුන’ වැනි ටෙලිනාට්‍යයක් නිෂ්පාදනය කරන්න තීරණය කළේ.
ගොඩක් දෙනෙක් අහන කතාවක් තමයි, දැන් සෑම නාළිකාවකම පෙන්වන එක රැල්ලට නිෂ්පාදනය කර ඇති ආකාරයේ ටෙලිනාට්‍යයක් නිර්මාණය කළේ නැත්තේ ඇයි ද කියන කතාව. අපේ පළමු නිෂ්පාදනය 'සුළඟ'. අපට ඕන වුණා ‘සුළඟ’ ටෙලිනාට්‍යයෙන් පසුව වෙනස්ම ආකාරයක් ගත් උසස් නිර්මාණයක් කරන්න. එහිදී වැයවන මුදල පිළිබඳ අපි හිතුවේ නෑ. අපට ඕනෑ වුණේ හොඳ දෙයක් කරන්න. ඒ නිසයි අපි ‘අළු බඳුන’ නිර්මාණය කළේ.
දැන් ඔබ නිවේදන කටයුතුවලින් දුරස්වෙලා ද?
'හීන හතක්' වැඩසටහනට පමණයි මම දැනට දායක වෙන්නේ. ඒ; රංගනයට වගේ ම නිර්මාණකරණයට වැඩි කාලයක් ගත කරන්න සිදුවෙලා තියෙන නිසා. නමුත් මම නිවේදන කටයුතුවලින් සම්පූර්ණයෙන් ම දුරස් වෙලා නෑ.
දැන් තනිවම හිටිය ඇති නේද?
ඔව් ඒක නම් එහෙම තමයි. ඒත් තවම තනිය මකන්න කවුරුත් හම්බ වුණේ නෑ.
READ MORE - තනිය මකන්න තවම කවුරුත් හම්බ වුණේ නෑ