ශිහාන් උත්තර බඳී

සිරස සුපර්ස්ටාර්ස් වේදිකාවේ ගී ගැයූ ඔබ එහි පස්වැනි අදියරේ දී විනිශ්චයකරුවෙකු බවට පත්වෙලා. මොකක්ද මේ වෙනස.

සිරස සුපර් ස්ටාර්ස් විනිශ්චය මණ්ඩලයට ඇතුළත් වෙන්න කියලා මට ආරාධනාවක් ලැබුණා. මට බොහොම සතුටුයි ඒ ගැන. මම ආධුනිකයෙක් විදියට ඒ වේදිකාවේ ගායනා ඉදිරිපත් කළා. දැන් ඊට අවුරුදු අටකට පසුව ඒ වැඩසටහනේම විනිශ්චය මණ්ඩලයේ ඉන්න ලැබෙන එක ලොකු ආඩම්බරයක්. සිරස මා ගැන ලොකු විශ්වාසයක් තැබිම ගැන මම ස්තූතිවන්ත  වෙනවා.  අනෙක් කාරණය තමයි , නිරෝෂා විරාජිනි කියන්නේ මම ගීත ගායනා කරද්දී මාව විනිශ්චය කරපු කෙනෙක්.

ඒ නිසා ඒ වගේ ප්‍රවීණයොත් එක්ක එකම තලයක ඉඳගන්න ලැබිමත් ලොකු වාසනාවක් විදියටයි මම සලකන්නේ.

ඔබේ නිර්මාණ කටයුතු වල අලුත්ම තත්ත්වය ගැන ඇහුවොත්

මගේ තුන්වැනි ගීත ඇල්බමයේ වැඩ කටයුතු මේ වන විට අවසන්. මේ වසරේ  දෙසැම්බර් මාසේ අවසානයේ දී හෝ ජනවාරි මාසේ මුල් භාගයේ දී එය එළිදැක්වනවා. ඒ ඇල්බමයට මගේ ගීත 16 ක් ඇතුළත්.  උපේඛා නිර්මාණි සමග ගායනා කළ යුග ගීතයකුත්  ඊට ඇතුළත් වෙනවා.  මගේ තාත්තා සංගීතවත් කරපු එක ගීතයකුත් , ජිප්සීස් සංගීත කණ්ඩායමේ දුෂාන් ජයතිලක සංගීතවත් කළ ගීත දෙකකුත්, මේරියන්ස් සංගීත
අධ්‍යක්ෂණය කළ ගීත එකොළහකුත් ඒ අතර තිබෙනවා.  මගේම ශබ්දාගාරයක්  ආරම්භ කරන්නත් මේ වන විට සැලසුම් කරලා තියනවා. මේ දිනවල එහි වැඩ කටයුතු වලත් යෙදෙනවා.

රියැලිටි ගායන තරග සඳහා අපේ රටේ ප්‍රේක්ෂක අවධානය දැන් පහළ මට්ටමකට වැටිලා නේද?

මම සහභාගි වුණ “සුපර් ස්ටාර්ස්” පළමුවැනි අදියර හැමදෙනාටම අලුත් අත්දැකීමක් වුණා. ඊට ලැබුණු ප්‍රසාදය ජනප්‍රියත්වය ඉතා ඉහළයි. ඒ නිසා ඒ පළමුවැනි අදියරට සහභාගි වෙන්න ලැබිම අපට යම් වාසියක් වුණා. දෙවැනි අදියරටත් යම් පමණකට ඉහළ රසික  ප්‍රතිචාර ලැබුණා. නමුත්, ඉන්පසුව හැම නාලිකාවක්ම පාහේ රියැලිටි තරග පවත්වන්න පටන් ගත්තා. ඒ නිසා කාටත් වුවමනා වුණේ තරුවක් වෙන්නයි. ඒ නිසා ලංකාවේ ඉන්න කුඩා ජනගහනයෙන් 50 ක් විතර ඒ තරග වලට යොමු වෙද්දි, ඒවා නරඹන්න ඉන්න රසිකයෝ පිරිස අඩුවුණා. ඒ කාරණය නිසායි අද එවැනි තත්ත්වයක් ඇතිවෙලා තිබෙන්නේ. එහෙම නැතිව එය ඒ වැඩසටහන් වල වරදක් නමෛයි.

ඔබ මීට පෙර  නාමල් උඩුගම සහ රෝයි පීරිස් යන ගායන ශිල්පින්ගේ ගීත දෙකක් නව සංගීතය මුසු කොට ගායනා කළා. ඔබ ගායනා කරන, ප්‍රින්ස් උදය ප්‍රියන්තගේ “සඳරේණු වෑහෙනා” ගීතයත් මෑතක සිට මාධ්‍යවලින් ප්‍රචාරය වෙනවා. මේ නිසා වෙනත් ගායකයන්ගේ ගීත ගායනා කරන බවට චෝදනාවක් ඔබට එල්ල වෙනවා නේද?

චෝදනා එල්ල කරන්න හේතුවක් නැහැ. මොකද අයිතිකාරයෝ දැන ගෙනනේ, මම ඒ ගීත ගායනා කරන්නේ. ඒ ගීතවල අයිතිකරුවන්ගේ ඉල්ලීම්  තමයි මම ඉෂ්ට කරන්නේ.

ඒ සියලු ගීත ඔබ ගායනා කළේ අවසර ඇතිවද?

නාමල් උඩුගම, රෝයි පීරිස් , ප්‍රින්ස් උදය ප්‍රියන්ත මේ සියලු දෙනාගේ ඒ ගීතවල අයිතීන්, යම්කිසි ආයතනයකට පවරලා තිබෙනවා, ඕනෑම ගායකයකු ලවා ඒ ගීත ගායනා කරවන්න කියලා. ඒ ආයතනය තමයි මට ආරාධනා කළේ ඒ ගීත ගායනා කරන්න. ඒවාට අදාළ සියලුම නීතිමය ලියකියවිලි මා සතුව තබාගෙනයි මම මේ කතාකරන්නේ. එහිදී නාමල් උඩුගම පෞද්ගලිකවම මට කතා කරලා තමයි මම ඔහුගේ ගීතය ගායනා කළේ. ඒ අයගේ වුවමනාවට තමයි, මගේ හ¾ඩින් ඒ ගීත ගායනා කරවා ගන්නේ. නමුත් ප්‍රචාරය යන්නේ, මම ඒ ගීත අරගෙන ගායනා කරනවා කියලා. ඒ ගොල්ලන්ට තමයි ඕකෙ ආදායම ලැබෙන්නේ. මට මුලින් යම් ගෙවීමක් කළාම, මම ඒවා ගායනා කරනවා විතරයි.

නමුත් ඔබට චෝදනා එල්ලවන්නේ රිගින් ටෝන් සඳහා ලබාදීමේ අරමුණින් ඔබ ඒ ගීත ගායනා කරන බවටයි.

ප්‍රවීණයෝ ඇත්ත කාරණය කියන්න කැමති නැහැනේ. ඒ නිසා පහත් තැනින් වතුර ගලා යනවා වගේ මගේ කරපිටින් තමයි ඔක්කොම යන්නේ. ඔය රිගින් ටෝන්ස්වලට ගීත දාන්නේ මම නමෛයිනේ. වුවමනානම් හොයලා බලන්න “රෑ සිහිනෙන්” ගීතයේ සල්ලි යන්නෙ කාටද කියලා. ඒවා යන්නේ නාමල් උඩුගම, පද රචකයා ඇතුළු ඒ කණ්ඩායමට. ඒකෙන් මට රුපියලක් වත් ලැබෙන්නේ නැහැ. ඒ ගොල්ලො ප්‍රවීණයො හන්දා, ඒ බව කියන්න කැමැති නැහැ.

රෝයි පීරිස්ගේ “මා දෑසෙ වේදනා” ගීතය ඔබ ගායනා කළෙත් ඔහුගේ අනුදැනුම ඇතිවද?

ගායකයාට නමෛයිනේ ගීතය අයිති. යම් ආයතනයකට ගීතයක් විකුණලා තියනවා නම් ඒ ආයතනයට පුළුවන් ඒ ගීතය ගායනා කිරීමේ අවස්ථාව වෙනත් ගායකයෙකුට ලබාදෙන්න.  මගේ පළමුවැනි ඇල්බම් එක පවා එහෙමයි. මම මහරාජා ආයතනයට ඒක විකුණලයි මුදල් ගත්තේ. ඒ ආයතනයට ඕන නම් කවද හරි වෙනත් ගායකයකුට කියලා ඒ ගීතය ගායනා කරවා ගන්න පුළුවන්. ඊට පස්සේ මට කාලයක් ගිහිල්ලා කියන්න බැහැ, මගේ සිංදුව අරයා කියනවා, මෙයා කියනවා කියලා. මම ඔය ගීත තුනම ගායනා කරලා තියෙන්නේ ඔය සියලු දෙනා මට පවරලා  දීපු ලිපි ‍ලේඛන මගේ අතේ තියාගෙනයි. ගායකයෙක් විදියට මට පෞද්ගලිකවම කතා කරලා ගීතය පැවරුවේ නාමල් උඩුගම විතරයි. තුන් වැනි ගීතය ප්‍රින්ස් උදය ප්‍රියන්ත නිල්වලා ආයතනයට පවරලා තිබුණා. රෝයි පීරිස්ගේ ගීතයේ අයිතිය තියෙන්නේ, ඔහුගේම ගුරුවරයාට. එතුමා විසින් ඒ ගීතය යම් ආයතනයකට විකුණුවායින් පසුව තමයි, ඒ ආයතනය මගේ හඬ මිලදී ගත්තේ.

ඒ කටයුත්ත ගැන අඩුම තරමේ ඔහුව දැනුවත් කළේ වත් නැහැ කියලා රෝයි පීරිස් ඔබට චෝදනා කළා?

එයා ඒක ඒ ගීතය අයිති කෙනාත් එක්කයි කතා කර ගන්න ඕන. මාත් එක්ක කතා කරලා වැඩක් නැහැ. මගේ පළවෙනි ඇල්බම් එකේ “අද තනියෙන් මා”, “සෙව්වන්දියේ” වගේ ගීත කිසිවක් ගැන මහරාජා ආයතනය  මගෙන් අහන්න වුවමනා නැහැ, වෙනත් කෙනකු ලවා ගායනා කරනවා ගන්න. මොකද, ඒවා මම විකුණලා ඉවරයිනේ. නමුත් ඒක අහල කිරීමේ සදාචාරාත්මක බවක් නම් තිබෙනවා.
දැනටත් ගොඩාක්  ප්‍රවීණ ගායක ගායිකාවන් ඒ ගොල්ලන්ගේ ගීත ගායනා කරන්න කියලා මට ආරාධනා කරනවා. නමුත් අලුත් ඇල්බම් එකේ වැඩකටයුතු නිසා මේ දිනවල ඒ කටයුතු වල යෙදෙන්නේ නැහැ. මගේ ඇල්බම් එක නිකුත් කළාට පස්සේ සමහර විට මම ඒ ගීත ගායනා කරන්න ඉඩ තිබෙනවා.

නීතිමය අවසර ඇතිව වුවත්, තමන්ගේම ගීත තිබෙන ගායන ශිල්පියකු ලෙස ඔබ ඇයි වෙනත් ගායකයින්ගේ ගීත ගායනා කරන්නේ?

වෙන කිසිම හේතුවක් නමෛයි, ආර්ථිකමය වාසියක් බලාගෙනයි එහෙම කරන්නේ . ඒ ගීතවල මුල් ගායකයො කරන්නෙත් ඒවා විකුණන එක. මම කරන්නෙත් මගේ හඬ  විකුණන එක. අපිට රජයෙන්  විශ්‍රාම වැටුපක් ගෙවන්නේ නැහැ. ඒ වගේම ඔය කතා කරන මාධ්‍යවලින්වත් අපි වයසට ගියාම අපි ගැන බලන්නේ නැහැ.  මගේ වෘත්තීය කලාව. ඒ කලාව ඇතුළෙ හම්බ කරන්න තියෙන මාර්ගවල අනිවාර්යයෙන්ම අපි යා යුතුයි. අපි ගායනා කරන ගීත මාධ්‍ය වලින් ප්‍රචාරය වෙද්දී ඒවාට මුදල් ගෙවනවා කියන බොරු කතා, රිගිං ටෝන් සඳහා ගීත ලබා ගැනීමේ දී රවට්ටන රැවටිලි වගේ දේවල් මිස කිසිම කෙනෙක් කලාකරුවා ගැන බලන්නේ නැහැ. කලාකරුවෝ එකතු වෙලා පිහිටුවා  ගත්ත පදනම් වලින්වත් කලාකරුවො ගැන බලන්නේ නැහැ. ඒ ඔක්කොම කරන්නේ බොරු. දන්නවනේ ලංකාවේ කලාකරුවෝ වයසට ගියාම මොනවද කියන්නේ කියලා. ඒක ලංකාවේ වැරැද්ද. ඇත්තටම, ඒක වෙනස් විය යුතුයි. ඒ නිසා තමන් තනියම කරගත්ත දෙයක් තමයි කලාකරුවන්ට අන්තිමට ඉතුරු වෙන්නේ.

කිෂාන් කනංකෙ

Lakbima