----- Please Turn on your speakers & listen our " Lanka ART web Radio "----- Send us your art Related news to ** lankaart1@gmail.com ** -----

Pages

Lanka Art Chat Room - එන්න අපි කතා කරමු

නිහඬව නික්‌ම ගිය සුන්දර මිනිසා ඊබට්‌ විඡේසිංහ

Tuesday, February 5, 2013


නිහඬව නික්‌ම ගිය සුන්දර මිනිසා ඊබට්‌ විඡේසිංහ

සංජීව මතඟවීර - නෝනාගම


සුවහසක්‌ සහෘද කලාකරුවන්ගේ, සිනමා ලෝලීන්ගේ හා ඥති හිතවතුන්ගේ සෝ සුසුම් මැද ප්‍රවීණ හා සම්මානනීය වේෂ නිරූපණ ශිල්පී ඊබට්‌ විඡේසිංහයන් ඊයේ දැයෙන් සමුගත්තේය.

සැත්තෑ එක්‌ වසක තම ජීවන ගමනේ පනස්‌ එක්‌ වසක්‌ම ඊබට්‌ විඡේසිංහ සිනමාව හැඩ කිරීමට තම දායකත්වය ලබා දුන්නේය.


මහනුවර පාතදුම්බර කොස්‌ගම සුන්දර ගම් පියසෙහි විසූ අරුනෝලිස්‌ විඡේසිංහ හා ඇලන් ජයවර්ධන යුවළගේ දරුවන් නම දෙනා අතරින් සිව්වැන්නා ලෙස උපත ලැබූ ඊබට්‌ විඡේසිංහ, පාසල් දිවිය තුළම සිය කලා හැකියාවන් පෙන්නුම් කළේය. පාසල් වේදිකාවේ සිය රංගන හැකියාව විදහා දැක්‌වූ ඔහුගේ ඊළඟ අභිප්‍රාය වූයේ ලංකාවේ ප්‍රකට රංගන ශිල්පියකු වීමටය. ඒ සිහින සඵල කර ගන්නට ඔහු සිය සොහොයුරු වන රංගන ශිල්පී එඩ්මන් විඡේසිංහයන් සමඟින් කොළඹට ආවේය. නමුත් ඔහුගේ දෛවය වෙනස්‌ කරන්නට ඒ කොළඹ ගමන සමත් වූයේය.

ආතර් සී. ක්‌ලාක්‌, තිස්‌ස ලියනසූරිය, ශේෂා පලිහක්‌කාර වැනි ප්‍රවීණයන් අතර වන් ඊබට්‌ සෙරන්ඩිබ් සිනමා ආයතනයෙහි සහාය කලා අධ්‍යක්‍ෂවරයකු කාර්මික ශිල්පියකු, සහාය වේෂ නිරූපණ ශිල්පියකු ලෙස තම සිනමා ගමන ආරම්භ කළේය. එහෙත් විඡේසිංහයන්ගේ රංගන සිහිනය යටපත් කරන්නට ඔහුට නොහැකි විය.

"පුතා.... රංගනය නොව දැතේ රැකියාවක්‌ ඉගෙන ගැනීම ඔයාගේ අනාගතයට සුදුසුයි..." වේශ නිරූපණ ශිල්පී ශේෂා පලිහක්‌කාර මහතා දුන් ඔවදන පිළිගත් විඡේසිංහ ඔහු යටතේ සහාය වේෂ නිරූපණ ශිල්පියකු ලෙස චිත්‍රපට ගණනාවකම කටයුතු කළේය. තිස්‌ස ලියනසූරිය විසින් අධ්‍යක්‍ෂණය කරන ලද "සාරවිට" සිනමා කෘතියේ ප්‍රධාන වේෂ නිරූපණ ශිල්පියා ලෙස කටයුතු කිරීමට ලද වරම ප්‍රයෝජනයට ගත් ඊබට්‌ තම රංගන සිහිනය යටපත්කර ගනිමින් වේෂ නිරූපණ ශිල්පියකු ලෙස තම සිනමා ගමනට ප්‍රවිශ්ඨ විය.

ජෝ අබේවික්‍රමයන් වෙස්‌ ගන්වමින් ඇරැඹුණු එම ගමන හුලවාලි, දැස නිසා, සිරිබෝ අයියා, බඹරු ඇවිත්, අපේක්‍ෂා, අහසින් පොළවට, සිකුරුලියා, ගඟ අද්දර, බද්දේගම, සරුංගලේ, නොමියන මිනිසුන්, සිසිල ගිනිගනී, පවුරු වළලු, පුරහද කළුවර, කෙළිමඬල, ආදී එදා සිට අද දක්‌වා තිරගතවූ චිත්‍රපට විශාල සංඛ්‍යාවකට දායක වූ නළු නිළියන් රැසක්‌ වෙස්‌ ගන්වන්නට ඔහුට හැකිවිය. ඔහු අතින් වෙස්‌ ගැන්වුණු රංගන ශිල්පියකු නොමැත්තේනම් ඒ අතළොස්‌සක්‌ පමණකි. මේ අතරතුර ඇතැම් සිනමා හා ටෙලි නාට්‍ය හරහා තම සිහිනය වූ රංගනය සැබෑ කර ගන්නටද ඊබට්‌ ට හැකියාව ලැබිණි.

සාරවිටින් ඇරැඹුණු ඊබට්‌ගේ ගමන මෑතකදී නිර්මාණය කෙරුණු සුමිත්‍රා පීරිස්‌ අධ්‍යක්‍ෂණය කළ "වෛශ්‍යාමනී" චිත්‍රපටය දක්‌වා විහිදිනි.

තම අත්හදා බැලීම්, නව සොයා ගැනීම්, පොතපත හා සිය දක්‍ෂතාවය ඔස්‌සේ ශ්‍රී ලංකාවේ වේෂ නිරූපණ කලාව දිනෙන් දින නවමු මාවතකට ගෙන එන්නට ඊබට්‌ විඡේසිංහයන්ට හැකියාව ලැබුණේය.

වේෂ නිරූපණ වෘතAතීය ගරුත්වයෙන් යුතු වෘත්තියක්‌ බවට පත්කරන්නට ඔහු ඕනෑම අවස්‌ථාවක ඉදිරිපත් වූයේය. අසාධාරණය ඉදිරියේ හිස නොනැමූ ඊබට්‌ තම වෘත්තීය ගරුත්වය හා එහි අනාගතය රැකගන්නට නොපැකිලිව ඉදිරිපත් විය. විදේශ සිනමා නිෂ්පාදනයන් කිහිපයකට ප්‍රධාන වේෂ නිරූපණ ශිල්පියා ලෙස කටයුතු කළ ඔහු ඒ ඔස්‌සේ විදේශ සිනමාවේ වේෂ නිරූපණ ශිල්ප ක්‍රමද ලංකාවට හඳුන්වා දුන්නේය.

විඡේසිංහයන්ගේ නිබඳ අධිෂ්ඨානය වූයේ වේෂ නිරූපණය ඉගැන්වීමට ජාතික මට්‌ටමේ වැඩපිළිවෙළකට දායක වීමටයි. ඒ සඳහා ඔහු කීපවරක්‌ උත්සාහ දැරුවද බලධාරීන්ගේ උදාසීනත්වය හමුවේ එය සාර්ථක වූයේ නැත. එහෙත් ඔහුගේ ගුරු හරුකම් ලැබූ කිහිප දෙනකු අද ලංකාවේ දක්‍ෂ වේෂ නිරූපණ ශිල්පීන් බවට පත්ව ඇත. පසුගිය 26 වැනිදා ඊබට්‌ විඡේසිංහයන්ගේ ප්‍රිය බිරිඳ වන සරෝජනී විඡේසිංහගේ හැටවන උපන් දිනය යෙදී තිබුණේය. විඡේසිංහයන්ටත්, සරෝජනීටත් හොරා ප්‍රවීණ වේෂ නිරූපණ ශිල්පී රංජිත් මතඟවීරගේ නිවසේ ඒ වෙනුවෙන් උපන්දින සාදයක්‌ නිර්මාණය විය. සන්ධ්‍යාවෙහි සරෝජනීටත්, ඊබට්‌ටත් ඊට ආරාධනා ලැබිණි. සාදය සංවිධානය කර තිබුණේ සරෝජනීගේ සහෝදර සහෝදරියන් ඇතුළු ඥතීන් විසිනි. ඊට පනස්‌ දෙනෙකු පමණ එක්‌ව සිටියේය. එහිදී වඩාත් ප්‍රීති වූයේ විඡේසිංහයන්ය. කවදත් සොඳුරු මිනිසකු වූ ඔහුට සිය ඥතීන් ඉදිරියේ ගී ගැයීමට සිදුවිය. ඔහු එක දිගට ගීත 21 ක්‌ ගායනා කළේය. අවසන් වරට ඔහු ගැයුවේ "බුද්ධං සරණං ගච්ඡාමි" ගීතයයි. විදේශයන්හි සිටින ඥතීන්ද අන්තර් ජාලය ඔස්‌සේ සාදයට සම්බන්ධ විය. ඔවුන්ගේ ඉල්ලීම්වලට ගී ගයන්නටද ඊබට්‌ ට සිදුවිය. සාදය 27 වැනිදා අලුයම 3.30 දක්‌වා පැවැත්විණි. සාදය අවසානයේ ඊබට්‌ සැමට ස්‌තුති කර කතාවක්‌ද පවත්වා සිය නිවසට ගියේ සිය බිරිඳද සමගය. මඳ වේලාවක්‌ නින්දේ පසුවූ විඡේසිංහ ජලය පානය කිරීම සඳහා මුළුතැන්ගෙයට ගොස්‌ සිටියේය. එහෙත් ඒ වන විට ලතෙක්‌ ඇති මෙම සුන්දර මිනිසාගේ හදවත නතරවී තිබිණි. සුවහසක්‌ සිනමා ලෝලීන්ගේ ගෞරවය දිනාගත් සහෘද කලා ශිල්පීන්ගේ ආදරය දිනාගත් ඥති හිත මිතුරන්ගේ හදවත පැහැරගත් සුහද මිනිසා අද අවසන් ගමන් යන්නට සූදානමින් සිටී. එහෙත් ඔහුගේ අතින් හැඩ ගැන්වුණු සිනමා නිර්මාණ ඉදිරියේදී රසිකයන්ට රස විඳින්නට හැකියාව ලැබෙනු ඇත. ඔහුගේ නම සිනමා ඉතිහාසයේ රන් අකුරින් ලියෑවෙනු ඇත.

ප්‍රවීණ රංගන ශිල්පියකු වන ටෝනි රණසිංහයන් ඊබට්‌ගේ සේයාරුවක ලියා තිබූ වැකියක්‌ මා හට සිහිවෙයි.

"නන් වෙස්‌ මැවීම් කළ හැක්‌කේ දෙවියන්ට පමණි. නමුදු ඊබට්‌ගේ වෙස්‌ මැවීම් ඉදිරියේ දෙවියෝද මවිත වෙති."

සොඳුරු සහෘදයාණෙනි... අපි ඔබට නිවන්සුව පතමු.·

Divayina

0 comments:

Post a Comment