----- Please Turn on your speakers & listen our " Lanka ART web Radio "----- Send us your art Related news to ** lankaart1@gmail.com ** -----

Pages

RADIO

ලීසයි මමයි සමානයි

Saturday, June 16, 2012

ආසියානු පැසිපික් රූ රැජණට තරග වදින ගයේෂා සමඟ කතාබහක්
අවට කඳුවල වැදී නැඟෙනා මඳ නලෙහි මුණු මුණුව සමඟ මුමුණන ළදැරියක්. දැලි කුණු දූලි ගෑවුණු ගවුම අපට සිහිපත් කරන්නේ ඒ වයසේදී ඇයට විඳින්නට වුණු අතෝරයන් ගැන. ඇයටත් වඩා උස වතුරපිරුණු පනිට්ටුව මේ පුංචි ළදැරිය උස්සගෙන එන්නේ අපහසුවෙන්.
අම්මෙක්, තාත්තෙක් නැති ඈ ගෙවන මේ දුක්ඛිත ජීවිතයට ආලෝකය ගේන්නේ නගරාධිපතිතුමා. ඇගේ මෙහෙකාර සේවයට දිගු නිවාඩුවක් දෙන ඔහු ළදැරියව හදා වඩා ගන්නේ තමන්ගේම දුවෙක් වගේ. ඈ ‘දූලි පින්තාරු’වේ ලීසා. කාලය ගෙවිලා ගියා. කාගෙත් හිත ගත්ත මේ අපූරු කෙළි පෙඩ්ඩ යුවතියක් වුණා. යුවතියක් ලෙසින් ඔබ හමුවට පැමිණි ඒ ලීසාව හොයා ගෙන අපි ගියේ හැව්ලොක්ටවුමට. ලැබුණු දුරකතන ඇමතුමට අනුව අපි ඒ ආසන්නයේම නතර වුණේ ඇගේ රුව දකින අදහසින්. ඒ ඇසිල්ලෙන් අසල තිබුණු රූපලාවන්‍යාගාරයෙන් එබිල බැලුවේ ලීසා. ඔබ හොඳින් හඳුනන ඈ ගයේෂා පෙරේරා.
‘ඉතිං ලීසා’
‘ ‘දූලි පින්තාරු’ හි ලීසාගේ චරිතයට ප්‍රේක්ෂකයන්ගෙන් ලැබුණු ප්‍රතිචාර වගේම ආදරය තවත් එවැනි වෙනස් චරිතයකට පිවිසීමට ලැබෙන ආරාධනයක් කියලයි මට සිතෙන්නේ. දූලි පින්තාරු ටෙලි නාට්‍යයයේ පිටපත මට ලැබුණේ මාස 06 කට කලින්. පිටපත කියෙව්වාට පස්සේ මම ලීසා ගැන සොය බැලුවා. ටෙලි නාට්‍යයට පාදක වුණු ‘ලේ මිසරාබ් ලේ’ කෘතියේ ලීසා පිළිබඳ පුංචි අධ්‍යයනයක යෙදුණා. ඒ වෙන කොට රූපවාහිනියේ විකාශය වුණු ‘මනුතාපය’ චිත්‍රපටය මා නරඹා තිබුණා.
එහි ලීසා පිළිබඳත් මගේ මතකය අලුත් වුණා. මේ ලැබුණු අත්දැකීම් සමඟ අධ්‍යක්ෂවරයා බලාපොරොත්තු වන ලීසා කවුද කියලත් ඔහු මට පැහැදිලි කිරීමක් කළා. මේ සියල්ලේ එකතුවකින් සැදුණු තරුණ ලීසා කෙනෙක් තමයි ප්‍රේක්ෂකයා දැක්කේ. ඒ වගේම මා රඟපෑ චරිත අතරින් වඩාත්ම මගේ ආදරය දිනා ගත්තේ දූලි පින්තාරු හි ලීසාඈට මගේ ජීවිතයේ යම් යම් අවස්ථාවලදී බොහොම සමීප බවක් ඇත කියා දැනෙන බවත් කියන්නම ඕන.’
ඒ කුමන අයුරින්ද?
‘තරුණ අවධියේ රඟපෑ චරිතයට මම පණ පෙවුවත් මගේ ළමා කාලය රඟපෑවේ සඳලි චූටි නංගියා. ඇගේ ස්වරූපයත්, මගේ ළමා කාලයේ ස්වරූපයත් එකට පෑහෙන්නේ නොසිතුව විදියටයි. ලීසා මට වඩාත් ළඟ බවක් දැනෙන්නේ ඒ නිසා වෙන්නට පුළුවන්. මේ මොන දේ වුණත් ටෙලි නාට්‍යයෙහි පුංචි ලීසා තරම් මා දුක් විඳපු චරිතයක් නම් නොවෙයි.’
රංගනයට පිවිසෙන්නට පෙර ඈ ජාත්‍යන්තර රූ රැජින තරගයකට ඉදිරිපත් වුණු සුන්දරියක්. මේ අපූරු ආරාධනයට ඈ යොමු වෙන්නේ ගල්කිස්සේ ෆාම් බීච් හෝටලයේ රැකියාව අතරතුර. රූ රැජින තරගය අවසන් වී ගත වුණේ සතියක් වගේ කාලයක්. ගයේෂාගේ දුරකතනයට කතා කරන්නේ ටෙලි නාට්‍ය අධ්‍යක්ෂවරයෙක්. ‘නිම්වළල්ල ටෙලි නාට්‍යයෙන් රංගනයට පිවිසෙන මට දිගින් දිගටම රඟපාන්නට ආරාධනා ලැබෙනවා. ඒ අතරතුරදියි 2009 වසරේ සංචාරක රූ රැජින තරගයට පෙනී සිටින්නේ. මේ සංචාරක රූ රැජින තරගයෙන් මට දක්ෂම රූමතිය වීමේ වරම් ලැබෙනවා. ඒ ජයග්‍රහණය එදා මට දැනුණේ මගේ ජයග්‍රහණයකට වඩා මගේ රට ලැබූ ජයග්‍රහණයක් විදියටයි.
මේ දවස්වලත් මා මේ කඩිමුඩියේ සූදානම් වෙන්නේ ලෝක ආසියානු පැසිපික් රූ රැජින තරගයටයි. මේ තරගයට මා යොමු කරවන්නේ යොරාකා එන්ටර්ටේට්මන්ට් ආයතනයේ ගෝමස් මහත්මියයි. ඔවුන්ගේ මූලිකත්වයෙන් ලැබුණු මේ තරගය මගේ ජීවිතයට තවත් අභියෝගයක්. ඒ අභියෝගය ජය ගන්නයි මා මේ තරම් මහන්සි වෙන්නේ. තරගය සඳහා මා සමඟ රටල් 75 ක රූප රාජිනියෝ තරග වදිනවා. එහිදී මා ඉදිරිපත් වන්නේ මගේ රටේ නමින්.
රට ජයග්‍රහණය කිරීමේ මූලික වගකීම පැවරිලා තිබෙන්නේ මටයි. ඒ සඳහා රටේ අනන්‍යතාවන් හැඟෙන ඇඳුම් නිර්මාණය කරන්නේ චරිත්, දයානන්ද වගේම භාණු කියන මෝස්තර නිර්මාණකරුවන්. විවිධ අවස්ථාවන්වලදී ඉදිරිපත් කළ යුතු නර්තනයන් පිළිබඳ පුහුණු කරන්නේ චන්දන වික්‍රමසිංහ කියන මගේ නැටුම් ගුරුතුමා. අන් තරගවලදී වගේම මේ තරගයේදීත් ඔහුගෙන් ලැබෙන ගුරුහරුකම් මට රටක් වටිනවා.’
රටේ අනන්‍යතාව විදහා දැක්වෙන ඒ විශේෂ ඇඳුම පිළිබඳ යමක් කිව්වොත්.
රටේ අනන්‍යතාවය මැවෙන ජාතික ඇඳුම මෙවර නිර්මාණය වෙන්නේ මොනර පිහාටුවලින් වීම විශේෂත්වයක්. මේ විශේෂ මොනර ඇඳුම පිළිබඳ ඔබට යමක් කිව යුතුමයි. බොහොම මහන්සියෙන් වගේම සුන්දර ආකාරයෙන් නිම කළ ඇඳුම වෙනුවෙන් මා රජයෙන් බලපත්‍රයක් ගත්තා. ඒ මේ සුන්දර ඇඳුම රැගෙන යන්න වගේම රැගෙන එන්නයි.’
පුංචි තිරය, රිදී තිරය කියන මාධ්‍ය දෙකම ඔබට නුහුරු නුපුරුදු නොවුණත් වේදිකාව තවමත් ඔබට ආගන්තුක තැනක් නේද?
‘රිදී තිරය පිළිබඳ කතා කරන කොට මගේ පළමු චිත්‍රපටය පිළිබඳත් යමක් කිව යුතුයි. ‘පියාඹන මාළුවෝ’ කියන චිත්‍රපටයට මට ආරාධනා කරන්නේ සංජීව පුෂ්ප කුමාර කියන අධ්‍යක්ෂවරයා. මේ චිත්‍රපටය මගේ රංගන ජීවිතයේ විශේෂ නවාතැන්පොළක්. අද වන විට අන්තර් ජාතික සම්මාන රාශියක් ලබා ගන්නට තරම් ‘පියාඹන මාළුවෝ’ චිත්‍රපටයට හැකි වෙලා. ඒක කොයි තරම් සුභ ආරංචියක්ද? මේ ගැන සිහි කරන විටත් මම චිත්‍රපටය වෙනුවෙන් කළ කැප කිරීම ගැන දැනේනේ සතුටක්.
.ඒ වගේම වේදිකාව ගැන කතා කළොත් වේදිකා රංගනයට පිවිසීමේ ආශාවක් මගේ සිත තුළ නලියනවා. නමුත් වේදිකාව කියන්නේ බොහෝ කාලය කැප කළ යුතු , වගකීම් රාශියකින් බැඳුණු තෝතැන්නක්. දක්ෂ රංගන ශිල්පීන්ගේ මුල නිර්මාණය වී තිබෙන්නේ එතැනින්. එතනට යන්න මා කැමැත්තෙන් සිටියත් ඊට හරස් වී ඇත්තේ කාලයයි. ආරාධනයක් ලැබුණොත් ඒ පිළිබඳ සිතා බැලීමට මා අදහස් කරනවා.’
‘පියාඹන මාළුවෝ’ චිත්‍රපටයේදී ගයේෂාට විවිධ වූ අකරතැබ්බයන්ට මුහුණ දෙන්නට සිදු වුණත් ඈ ඒවා සාර්ථකව ජය ගත්තා.
එහෙම නේද?
‘එහෙම කියද්දී මගේ සිතට නැඟෙන්නේ චිත්‍රපටයේ එක ජවනිකාවක්. මුහුදට ඉදිරිපස තිබෙනා ප්‍රධාන මාර්ගයට මුහුණ ලා ඇති යෝධ උස ගල මුදුණේ රූපගත කිරීමට තිබුණු ඒ අවස්ථාව බිය ජනකයි. අධ්‍යක්ෂවරයා ඒ ජවනිකාව රඟපාන්න පුළුවන්ද කියලා අහන කොටම මම දෙවරක් සිතුවේ නැතිව හා කියලා උත්තර බැන්දා. ගල මුදුනට නගින ගමන බොහාම දුෂ්කර වුණා. අනික් අයගේ උදව්වෙන් ගල තරණය කරමින් මම ගල මුදුනටම ගියා. සුළඟ බොහොම තදයි. සුළඟට කරකැවිලා දැන් දැන් මාව බිම වැටෙයි කියලා හිතුණත් ඒ සිතුවිල්ල යටපත් කරගෙන චරිතයට පිවිසෙන්න මා උත්සාහ කළා. ඒ කාරිය සාර්ථක වුණත් ඊළඟට ගලෙන් බිමට බහින්න කළ දහිරිය දන්නේ මාත් ඒ කණ්ඩායමත් විතරයි.’
මේ වන විටත් ටෙලි නාට්‍යය කිහිපයකට ගයේෂාට ආරාධනා ලැබිලා.
ලීසාගේ චරිතයෙන් පස්සේ රංගනයට පිවිසීමේදී ඔබ තෝරා බේරා ගෙන චරිත නිරූපණය කරාවිද?
‘රංගන කටයුතුවලදී මා නිර්මාණ භාර ගන්නේ වසරකට ටෙලි නිර්මාණ දෙකක් පමණයි. දූලි පින්තාරුවල වගේ යමක් කළ හැකි චරිතවලට යොමුවීමේ දැඩි පිපාසයකින් මා පෙළෙනවා. දෙනුවර කිරණ, සඳ එළිය, මිල්ලෑව වලව්ව කියන මගේ රංගනය රැගත් ටෙලි නාට්‍ය ළඟදීම විකාශය වේවි.’ මේ සියලු දේ අතර ඇගේ සිත ලෝක ආසියානු පැසිපික් රූ රැජින තරගය අසල නතර වෙලා.
‘මා උත්සාහ කරන්නේ අන් තරගකරුවන්ට හොඳ තරගයක් දෙමින් ආසියානු පැසිපික් රූ රැජින වන්නයි. ඒ සිහිනය හදවතෙහි සඟවා ගනිමින් පෙරටම යන්නයි.’
‘ඒ සිහිනය සිහිනයක්ම නොවී සැබෑවක්ම වේවා’ ගයේෂාගෙන් සමුගන්න මොහොතේ අප ඇයට පැවසුවේ හදවතින්මයි.
   Sarasaviya

0 comments:

Post a Comment