----- Please Turn on your speakers & listen our " Lanka ART web Radio "----- Send us your art Related news to ** lankaart1@gmail.com ** -----

Pages

RADIO

ටොරානා වෙතින් සංයුක්ත තැටි ත්‍රිත්වයක්

Sunday, September 5, 2010

සුවිශේෂී සංයුක්ත තැටි ත්‍රිත්වයක් පසුගිය දිනෙක එළිදැක්විණ, උසස් රසාස්වාදයෙන් යුත් හරවත් ගී නිර්මාණ කවදත් ශ්‍රී ලාංකේය ගීත ලෝලීන් වෙත පිරිනමන “ටොරානා” ආයතනය මගින් මෙම සංයුක්ත තැටි වෙළෙඳ පොළට නිකුත් කළේ විරාම සමයකට පසුවය.

දේශයේ අග්‍රේෂ්වර ගාන්ධර්වයාණන් වන ආචාර්ය පණ්ඩිත් අමරදේවයන්ගේ මනෝරම්‍ය ගී දහසයක් ඇතුළත් “බඹරෙකු ආවයි” ගීත සමුච්චයත්, වත්මන් ගී ලොවේ ජනපි‍්‍රයතම ගායිකාවන වන නෙලූ අධිකාරිගේ “කඳුළු” ගීත එකතුවත්, දිවයිනේ ජනපි‍්‍රයතම බටනලා වාද්‍ය ශිල්පී ජානක බෝගොඩගේ “ සුසර ගී” අනුවාදන එකතුවත් ඒ සංයුක්ත තැටි අතර වේ.

ශ්‍රී චන්ද්‍රරත්න මානවසිංහයන් විසින් විරචිත “ජගන්මෝහිනී” (ප්‍රථම සරසවිය සම්මාන උළෙල සඳහා නිර්මාණය කළ සරස්වතී ගීතය) ගීතයෙන් ඇරැඹෙන අමර ගීතාවලිය මහගමසේකරයන් රචනා කළ “ඈත කඳුකර”, “මළ හිරු බසිනා”, “ඇසේ මතුවන”, “ඔබේ දෑසයි”, “මා තුරුළේ” යන ගීතවලින් වඩාත් රසාලිප්ත වේ.

මඩවල එස්.රත්නායකයන්ගේ “බඹරෙකු ආවයි” මෙන්ම ඩෝල්ටන් අල්විස් ලියූ “පෙම්බර මා පුතණුවනේ” ගීතද මෙම සංයුක්ත තැටියට අන්තර්ගතය.

“ දස්කොන් සකිසඳ” හා “පසළොස්වක සඳ” යන මියුරු යුග ගී ද අමරදේවයන්, නීලා වික්‍රමසිංහ සමඟ යළි ගයා තිබීමද විශේෂත්වයකි.

මතු කී ගීත රචකයන්ට අමතරව මහාචාර්ය සුනිල් ආරියරත්න, ආචාර්ය අජන්තා රණසිංහ, ඩබ්ලිව් අබේසිංහ, පූජ්‍ය රඹුකන සිද්ධාර්ථ හිමි, යමුනා මාලිනී පෙරේරා, උදයසිරි පතිරණ සෙසු ගී රචනා කොට තිබේ.

මින්පෙර කිසිදු සංයුක්ත තැටියක අඩංගු නොවූ “දළඳා ගීතය” ට විශාරද නන්දා මාලිනීය ඇතුලු පිරිසක් ගායනයෙන් දායක වේ.

සරත් ද අල්විස්, හා මහින්ද බණ්ඩාර යන සංගීතවේදීන්ගේ අධීක්ෂණයෙන් යුතුව හේමලාල් ගීතදේව, විද්‍යා මුණසිංහ හා රංග දියබලනගේ “බඹරෙකු ආවයි” ගීතාවලිය පටිගත කර ඇත.

“කඳුළු” නෙලූ අධිකාරිගේ නවතම ගීත එකතුවයි. “සයුරේ රළ සේ” සහ “ මං නැතිදා” ගීත සමුච්චයන්ට පසුව ටොරානා සමඟ එක්ව ඈ එළිදැක්වූ ගීත එකතුව එය වේ.

අලංකාරවූත්, නම්‍යශීලී වූත් නෙලූ ගේ රන්ස්වරය විවිධ ගායන විලාශයන් හා අවස්ථා සඳහා සංගීතඥයෝ රිසි සේ යොදා ගනිති. එය නෙලූටද නව්‍ය අත්දැකීමක් හා ගායන පරිචය ලැබීමට කදිම මං පෙතක් විවර කර දී ඇති බව පෙනේ.

ප්‍රවීණ මෙන්ම නවීණ ගී පද රචකයන්, සංගීතවේදීන් කිහිප දෙනෙකුගේම නිර්මාණ සම්මාදමෙන් එළි දකින “කඳුළු” නෙලූ ගේ සතුටු කඳුළු රසිකයන්ගේ ඇස් මත පළඳවන සුබ පැතුමයි. ඇගේ අනන්‍ය ගායනවේදය “කඳුළු” තුළින් ප්‍රකට කෙරේවා යන්න අපගේ පැතුමයි.

සාමාන්‍යයෙන් ගී අනුවාදන ඇතුළත් සංයුක්ත තැටියක් එළි දැක්වෙන්නේ කලාතුරකිනි.

ඒ අඩුව පිරිමසාලමින් දශක දෙකහමාරක් තිස්සේ බටනලා වාදකයකු ලෙස සංගීත ලොවේ රැඳී සිටින ජානක බෝගොඩ “සුරස ගී අනුවාදන” ටොරානා ලේබලය යටතේ

ඉදිරිපත් කර තිබේ.

මෙරට මුල්ම බටනලා අනුවාදන සංගත තැටිය වන මෙහි ජනපි‍්‍රය හින්දි ගීත නවයක් සහ සිංහල ගීත හතක් මියුරු වද්දඬු රාවයෙන් වැයේ.

කේමදාසයන්ගේ “ මානසවිල”, වික්ටර් රත්නායකයන්ගේ “ස”, රෝහණ වීරසිංහයන්ගේ “ ආදරණීය රෝහණ”, සුනිල් එදිරිසිංහයන්ගේ “ අලුත් වැස්සක්”, දයාරත්න , අමරා යුවළගේ “උදුම්බරා” ප්‍රසංගවල බටනලා වාද්‍ය ශිල්පියා වූයේද ජානකය.

1988 වසරේදී ගුවන් විදුලි සංස්ථාවේ ස්ථීර සේවයට බැඳුණු ජානක ගමගේ තවමත් එහි වාද්‍ය ශිල්පියකු සේ කටයුතු කරයි.

කැසට් හා සංයුක්ත තැටි නිෂ්පාදනය බෙහෙවින්ම අවදානමට ලක්ව ඇති මෙවන් යුගයක ඒ අභියෝග ඉදිරියේ නොසැලී ටොරානා අධිපති සරත් කොතලාවලයන් තැබූ මේ යෝධ පියවර කාටත් ආදර්ශයකි.

0 comments:

Post a Comment